Өөрт тохирсон тэтгэлэгт хүрэх 3 АЛХАМ
АНУ-ын Гэйтс коллежийн залуус доорх зөвлөгөөг хүргэж байна.
Олон улсын тэргүүлэгч их дээд сургуульд суралцах зорилгыг өөртөө дэвшүүлээд байна уу? Өдөр бүр шахуу зарлагддаг олон мянган тэтгэлгээс өөрт тохирох тэтгэлгийг олж, сонгоход хүндрэлтэй байгаа бол дараах 3 алхмыг дагаад үзээрэй. Олон улсын нэр нөлөө бүхий тэтгэлгийн эзэд болсон АНУ-ын Гэйтс коллежийн залуус доорх зөвлөгөөг танд хүргэж байна. Та үзэг цаасаа бэлтгээд өөрийгөө сонсон, аль болох тодорхой, үнэн зөв тэмдэглэл хөтлөөрэй.
1-р алхам Зорилгоо тодорхойлох
Зөвхөн гадаадад амьдрахын тулд бус суралцсаныхаа дараа хаана ажиллаж, ямар үр дүнд хүрэхийг хүсч буйгаа тунгаан бодоорой. Үүний тулд дараах асуултуудад хариулаарай.
1.Миний хувьд хамгийн үнэ цэнэтэй зүйл юу вэ?
2.Би юу хийж байхдаа хамгийн аз жаргалтай байдаг вэ?
3. Ямар чиглэлээр суралцах вэ? Энэ үнэхээр надад таалагдаж байна уу?
4. Сургуулиа төгссөний дараах ирээдүйг хэрхэн төсөөлж байна?
5. 10 жилийн дараа би хэн байх вэ?
2-р алхам Судалгаа хийх
Өөрийн зорилгыг төсөөлөн төлөвлөсөн бол яг ямар сургалтад суралцахаа судлаарай. Үүний тулд дараах асуултад дэлгэрэнгүй хариулан бичээрэй.
1.Ямар сургалт надад илүү тохирох вэ? Лекц үү? Семинар уу? Онол практик хосолсон уу?
2. Миний суралцах мэргэжлээр дэлхийд тэргүүлэгч их сургууль аль вэ? Аль улсад байдаг вэ? Би тухайн улсад ямар ханддаг вэ? Дасан зохицож чадах уу? Улс үндэстнийх нь онцлог, сул ба давуу тал нь юу вэ?
3.Энэ мэргэжлээр ер нь ямар ямар их сургууль, ямар хэмжээний тэтгэлэгт хөтөлбөрийг зарладаг вэ? Хэзээ?
4. Тэдгээр тэтгэлэгт өрсөлдөх боломж буюу тэтгэлгийг олгох оюутны өрсөлдөөн ямар вэ? Монгол оюутан байдаг уу? Хамрагдаж байсан уу? Давуу талтай юу?
3-р алхам Төлөвлөгөө гаргах
Хаана, ямар чиглэлээр суралцах талаар хангалттай судалгаа хийсний дараа тэтгэлэгт хүрэх өөрийн төлөвлөгөөгөө гаргаарай.
-Аль улсын, ямар их сургуулийн ямар тэтгэлэгт хөтөлбөрт би өрсөлдөх гэж байна? Үүний тулд ямар бэлтгэлтэй байх уу? “Мөрөөдлийн” буюу өрсөлдөхөд хэцүү 3 хөтөлбөр, тэнцэх боломжтой 3 хөтөлбөр, гарцаагүй тэнцэх 3 хөтөлбөр гээд нийт 9 ба түүнээс дээш боломжит хувилбарын жагсаалт гаргаарай. Аль болох их хөтөлбөрт өргөдлөө илгээвэл тэнцэх магадлал ихтэйг санаарай.
-Ингээд тухайн тэтгэлэг зарлагдах хугацаа, шалгуур, хэрхэн өрсөлдөх мэдээллийг цаг алдалгүй авч, цагийн хуанли дээр “deadline” буюу эцсийн хугацаа, чухал шаардлагатай огноог тэмдэглээрэй.