Энэ жил биднийг орхин одсон алдартнуудыг дурсан санацгаая.
1-р сарын 15.
Энэ өдөр Лондон хотын нэгэн зочид буудлаас "The Cranberries" хамтлагийн дуучин Долорес О'Риорданы цогцос олдсон байна. Тэрбээр 46 настай байсан бөгөөд шинэ цомгон дээрээ ажиллаж байв.
1-р сарын 20.
Францын алдарт тогооч Поль Бокюз 92 насандаа нас барсан. Лионы ойролцоохь Коллонж-о-Мон-д’Ор тосгон дахь гэртээ тэр амьсгал хураасан. Түүний оршуулгад оролцохоор дэлхийн өнцөг булан бүрээс 1,5 мянган тогооч ирсэн байлаа.
3-р сарын 12.
Найруулгч, жүжигчин, "Современник" театрыг үүсгэн байгуулагчдын нэг Олег Табаков 81 настайдаа нас барсан. "Хаврын 17 учрал" киногоор нь монголчууд түүнийг сайн мэднэ.
3-р сарын 12.
Givenchy-г үүсгэн байгуулагч, домогт загвар зохион бүтээгч Юбер де Живанши нас нөгчжээ.
3-р сарын 14.
Их Британийн физикч Стивен Хокинг 77 настайдаа энэ ертөнцийг орхисон.
4-р сарын 14.
"Оскар" шагналыг хоёр удаа хүртсэн найруулагч Милош Форман нас барсан. "Хөхөөний үүрэн дээгүүрх нислэг" кино түүнд дэлхийн хэмжээний алдар нэр авчирсан билээ.
5-р сарын 15.
Америкийн зохиолч, сэтгүүлч Том Вулф Нью-Йорк хотод нас барсан. Байнга цагаан костюмтэй олны өмнө гарч ирдэг хүн байлаа.
8-р сарын 16.
Дуучин Арета Франклин 77 настайдаа хорвоог орхилоо. Сүүлийн хэдэн жил тэрбээр хүнд өвчинтэй тэмцэж байсан юм. Тэр бол рокн роллын алдрын музейд заларсан анхны эмэгтэй. Оршуулгын ёслол дээр түүний шарилыг алтан авсанд хийсэн. Арета Франклин 18 Грэмми шагнал хүртсэн, нийт 75 сая пянз нь борлогдсон дуучин байв.
8-р сарын 16
НҮБ-ын ЕНБ асан, Нобелийн энх тайвны шагналт Кофи Аннан 81 настайдаа таалал төгссөн. Тэр НҮБ-ыг тэргүүлсэн анхны африк хүн юм.
8-р сарын 26.
Америкийн сенатор Жон Маккейн 81 настайдаа насан эцэс болжээ. Тархины хорт хавдартай байсан энэ эрхэм ОХУ-ын эсрэг эвлэрэшгүй тэмцэл явуулдаг байв. Оршуулгын ёслолдоо Ерөнхийлөгч Доналд Трампыг оролцуулахгүй байхыг гэрээслэжээ.
8-р сарын 30.
Оросын эстрадын домог Иосиф Кобзон нас барсан. Тэрбээр 1997 оноос хойш Төрийн Думын депутатаар ажилласан.
10-р сарын 1.
Францын шансонье Шарль Азнавур 94 настай нас барсан. Амьдралынхаа турш тэрбээр 1,3 мянган дуу бүтээж, 60 кинонд тоглож, 200 сая ширхэг пянз борлуулсан юм.
10-р сарын 6.
Барселона хотын эмнэлэгт дуурийн хатан хаан Монсеррат Кабалье 85 насандаа амьсгал хураасан юм. Лучано Паваротти, Фредди Меркьюри нартай хамт уран бүтээл туурвиж явсан тэрбээр нийт 80 дүр бүтээжээ.
10-р сарын 26.
74 дэх төрсөн өдрөө тэмдэглэхээс ердөө ганц хоногийн өмнө ОХУ-ын алдарт жүжигчин Николай Караченцов нас барлаа. 2005 онд машины осолд орсноосоо хойш олны өмнө бараг гараагүй юм. "Электрон жаалын адал явдал" киногоор бид түүнийг сайн мэднэ.
11-р сарын 1.
Олимпийн аварга, 7 удаагийн дэлхийн аварга ЗХУ-ын хүндийг өргөлтийн тамирчин Юрий Варданян нас барсан. Арменид тэр Ерөнхийлөгчийн туслах, Гүрж дэх Элчин сайдаар ажиллаж байв. Хүү нь АНУ-ын шигшээ багт орж, олимпод түрүүлсэн билээ.
11-р сарын 26.
Италийн найруулагч Бернардо Бертолуччи хүнд өвчний улмаас 77 настайдаа нас барсан. Оскарын шагналт, "Алтан бөмбөрцөг", Берлин, Венецийн наадмын шагналт тэрбээр 2013 онд Холливудад алдрын одтой болсон билээ.
12-р сарын1.
АНУ-ын 41 дэх Ерөнхийлөгч Жорж Буш таалал төгссөн. Дэлхийн II дайн үеэр тэр Америкийн хамгийн залуу нисгэгч байв. Түүний хоёр хүү алдартай улстөрч болсныг бид мэдэх билээ.
