2020 оны эхний хагас жилд фитнесс аппликэйшний хэрэглээ 46 хувиар нэмэгджээ
Хөл хорионы улмаас дэлхийн ихэнх улсуудад үйлчилгээний газрууд хаагдсан билээ. Үүнтэй холбоотойгоор 2020 оны эхний хагас жилд фитнесс болон бусад эрүүл мэндийн холбогдолтой аппликэйшний хэрэглээ дэлхий даяар 46 хувиар нэмэгджээ.
MoEngage байгууллага 1.5 тэрбум хүн амьдарч буй таван том бүс нутгийг хамруулсан судалгаа явуулсан бөгөөд App Store, Play Store-ын мэдээлэлд тулгуурлажээ.
Дээрх өсөлтийг бүс нутгаар нь авч үзвэл:
Бүс нутаг | Аппликэйшний таталт хэдэн хувиар өссөн бэ? |
---|---|
Энэтхэг | 157% |
Ойрхи Дорнод, Хойд Африк | 55% |
Европ | 25% |
Ази - Номхон далай | 47% |
Бусад | 43% |
Америк | 21% |
Энэтхэг улсад 58 сая хүн (157 хувь) шинээр фитнесс болон эрүүл мэндийн аппликэйшн татаж авчээ. Энэ нь Итали улсын нийт хүн амын тоотой тэнцэх үзүүлэлт юм. 1.3 тэрбум хүн амтай тус улсад гуравдугаар сарын 25-аас тавдугаар сар хүртэл хөл хорио үргэлжилсэн нь ийнхүү фитнесс аппликэйшний хэрэглээ огцом нэмэгдэхэд хүрсэн аж.
Аппликэйшний таталтын тоо нэмэгдэхийн зэрэгцээ өдөр тутамдаа идэвхтэй ашигладаг хэрэглэгчдийн тоо ч давхар өсчээ. Дэлхий нийтийн хэмжээнд фитнесс аппликэйшнийг өдөр тутамдаа тогтмол ашигладаг хэрэглэгчдийн тоо жилийн эхний 6 сард 24 хувиар нэмэгджээ.
Тэгвэл аль аппликэйшнийг хүмүүс хамгийн их татсан бэ?
Sensor Tower судалгааны байгууллагаас мэдээлснээр дөрөвдүгээр сард хүмүүс дасгал хөдөлгөөнөөс илүүтэйгээр төвлөрөл, бясалгалд анхаарчээ. Дөрөвдүгээр сард унтах, бясалгах, тайвшруулах төрөл бүрийн хичээлтэй Calm аппликэйшн хамгийн өндөр буюу 8.5 сая доллар, Headspace аппликэйшн 5.5 сая долларын орлого олжээ.
Харин зургаадугаар сараас дэлхий нийтээрээ хооллолт, дасгал хөдөлгөөндөө анхаарч эхэлснийг харж болно. Тодруулбал, хооллолт ба хөдөлгөөнөө хянахад ашигладаг MyFitnessPal аппликэйшн орлогоороо тэргүүлж, Calm болон Headspace аппликэйшн хоёр, гуравдугаарт бичигджээ.
Эх сурвалж: We Forum