1 мин

Германд орон гэргүй хүмүүст зориулж 'унтлагын бүхээг' гудамжинд байрлуулж байна

Б.Саруул 2021.01.26

Цар тахал нийгмийн эмзэг хэсэг, тэр дундаа орон гэргүй хүмүүст хүндээр тусаж байна. Тэгвэл Германы Ульм хотод үйл ажиллагаа явуулдаг Ulmer Nest хэмээх компани орон гэргүй хүмүүст туслах бүтээлч санаачилга эхлүүлжээ. Тэд очих газаргүй болсон хүмүүс шөнийг дулаахан өнгөрүүлж, унтаж амрах боломжтой, нарны эрчим хүчээр ажилладаг 'унтлагын бүхээг' гудамжинд байрлуулж эхлээд байна.

Уг өвөрмөц загварын бүхээгийг тус компани туршилтын төслийнхөө хүрээнд бүтээж, өнгөрсөн жилийн нэгдүгээр сарын 8-нд олон нийтэд танилцуулж байжээ. Хэдийгээр бүхээгийн хөгжүүлэлт бүрэн дуусаагүй байгаа ч цар тахлын улмаас онцгой нөхцөл байдал үүссэн, орон гэргүй хүмүүс осгож, даарах эрсдэлтэй байгаа тул хотын гудамжинд суурилуулахаар болжээ.

Бүхээгийг мод болон ган төмрөөр хийсэн бөгөөд дотор нь хоёр хүн багтах боломжтой (эсвэл нэг хүн, тэжээвэр амьтан, ачаа тээшийн хамт) аж. Мөн бүхээг ус чийг нэвтрүүлдэггүй, хүйтэн, салхинаас хамгаалдаг, гадна суурилуулсан нарны хавтангаар дотор орчныг халаадаг гэнэ.

Түүнчлэн дотор нь хүн орсон тохиолдолд хаалга түгжигддэг бөгөөд дотроо радиогийн сүлжээтэй тул шаардлагатай нөхцөлд бүхээгийг хянах багтай холбогдох боломжтой юм байна. Хэрэв Ульм хот дахь туршилт амжилттай хэрэгжвэл бүхээгийг Герман улс даяар байрлуулах боломжтой гэж Ulmer Nest компаниас мэдээлжээ.