'YouTube'-т хүүхдүүдийн үзэх контентыг насны онцлогт тохируулан ангилдаг боллоо
YouTube эцэг эхчүүдэд зориулж хязгаарлалтын шинэ тохиргоог танилцууллаа. Ингэснээр YouTube Kids програмаас гадна хүүхдүүдийн үзэж болох контентыг насанд нь нийцүүлэх, тэдний онцлог, хөгжилд тохирсон агуулгыг аажмаар танилцуулах боломж бүрдэж байна. Одоогоор бета туршилтын шатанд явж байгаа тус програм ирэх саруудад илүү өргөн хүрээг хамарч, хэрэглээнд нэвтрэх гэнэ.
Шинэ тохиргоогоор эцэг эхчүүд дараах гурван түвшний хязгаарлалтыг YouTube-ийн контентод тавьж болох юм байна.
- Explore түвшин нь 9-өөс дээш насны хүүхдүүдэд (влог, зааварчилгаа, тоглоомын видео, хөгжмийн клип, мэдээ, боловсролын болон бусад контент багтана)
- Explore More түвшин нь 13-аас дээш насны хүүхдүүдэд тохиромжтой бол (дээрх төрлийн контентуудаас гадна шууд дамжуулалтын бичлэгийг үзэх боломжтой)
- Most of YouTube түвшин нь насны хязгаарлалттай контентоос бусад бүх контентын үзэх эрхийг олгосон тохиргоо юм.
Мөн програм хөгжүүлэлтийн шатандаа яваа учраас зарим нэг алдаа гарахыг үгүйсгэхгүй гэж YouTube анхааруулжээ. Тиймээс нэг удаа тохиргоог сонгоод орхих бус байнга шалгаж, сонор сэрэмжтэй байхыг эцэг эхчүүдэд зөвлөж байгаа аж.
Эх сурвалж: The Verge