1 мин

Ковидын эсрэг тэмцэгчдэд зориулсан гудамжны артистын зураг 23 сая доллараар зарагджээ

Б.Саруул 2021.03.24

Английн гудамжны артист Бэнксигийн цар тахлын эсрэг тэмцэж буй эрүүл мэндийн байгууллагын ажилчдад зориулж зурсан "Game Changer" нэртэй зураг 23.1 сая долларын үнэ хүрч, шинэ дээд амжилт тогтоолоо.

Тэрбээр энэхүү зургаа цар тахлын эхний давлагаа дэгдэх үеэр буюу 2020 оны тавдугаар сард Саутхэмптоны их сургуулийн эмнэлэгт хандивласан аж. Бэнкси уран бүтээлээ хандивлахдаа "Та бүхний хийж буй бүх зүйлд талархаж байна. Хэдийгээр зураг маань хар, цагаан ч гэлээ энэ газрыг багахан ч болов гэрэлтүүлнэ гэдэгт итгэж байна" гэх зурвасыг бичсэн байжээ.

Зурагт маск зүүж, нөмрөг нөмөрсөн Улаан загалмайн сувилагчийн дүртэй тоглоомоор тоглож буй бяцхан хүүг дүрсэлж, ойролцоох сагсанд бэтмен, хүн аалз хэвтэж байгаагаар илэрхийлжээ.

Дуудлага худалдаанаас олсон орлогыг Саутхэмптоны их сургуулийн эмнэлэг болон Их Британийн бусад эрүүл мэнд, буяны байгууллагуудад хандивлах гэнэ.

"Game Changer" нь Бэнксигийн өмнөх уран бүтээлээс бараг хоёр дахин өндөр үнээр худалдагдсан байна. Тухайлбал, Английн улстөрчдийг шимпанзегаар орлуулж, Нийтийн Танхимд сууж байгаагаар дүрсэлсэн "Devolved Parliament" нэртэй зураг нь 2019 онд 13.6 сая долларын үнэ хүрч байв.

Мөн "Girl With Balloon" нэртэй алдартай зураг нь 1.4 саяар зарагдсан билээ.

Бэнкси нэрээр танигдсан Английн алдарт гудамжны артист, улс төрийн активист, найруулагч энэ мэт олон уран бүтээлээрээ алдаршсан боловч өнөөг хүртэл өөрийн жинхэнэ нэрийг нууцалсаар ирсэн байна.

Эх сурвалж: CNN