2 мин

Шинэ Зеланд хүүхдээ алдсан эцэг эхэд цалинтай чөлөө олгоно

Ub.life 2021.04.06 1

Шинэ Зеланд улсад хэвлий дэх хүүхдээ алдсан эцэг эхчүүдэд цалинтай чөлөө олгох хууль батлагджээ. Сүүлийн жилүүдэд эхийн эрүүл мэнд, эмэгтэйчүүдийн ажлын байран дахь бэрхшээлүүд чухлаар тооцогдох болсон ч энэхүү шинэ хуулийн агуулгад эцэг хүнийг багтаасан нь цагаа олсон шийдэл болжээ. 

Тус хуулийн дагуу золгүй явдал тохиосон эцэг эхэд гурван өдрийн цалинтай чөлөө олгосноор сэтгэл зүйн үүднээс гашуудах боломжийг олгож буй. Үр зулбах болон амьгүй ураг төрөх үзэгдэл нь нийт жирэмслэлтийн 10-20%-д тохиодог бөгөөд гэр бүлийн гишүүдийн аль аль нь бие сэтгэлийн шарх, гутрал болон буруутгагдсан мэдрэмжид автдаг байна. Ялангуяа эх хүн өөрийн буруутай үйлдлээс боллоо хэмээн ихэд шаналдаг. Гэтэл ихэнх тохиолдолд гол шалтгаан нь үр хөврөлийн хромосомын согог болоод эцэг эхийн хянах боломжгүй эрүүл мэндийн бусад асуудлаас үүддэг байна. 

Тус хуулийн өөр нэгэн зорилго нь эцэг эхийн нуугдмал уй гашууг нийгмээс хүлээн зөвшөөрөх явдал юм. Учир нь үр зулбах асуудлаар хүмүүс ил тод нээлттэй ярилцдаггүй бөгөөд ихэвчлэн хөндлөнгийн хүмүүс “Ийм залуухан юм чинь, дахиад хүүхэдтэй болно доо” гэсэн тайтгаруулах үгс хэлээд өнгөрдөг байна. Харин сэтгэлийн шарх авсан эцэг эхэд хангалттай гашуудах орон зай байдаггүй ажээ. 

“Тус хууль нь хэрэгтэй үедээ ажлын чөлөө авахад туслах болно. Хүн бүхэнд сэтгэл зүй, бие физиологийн хувьд гашуудлыг даван туулах хугацаа хэрэгтэй болдог”

- Тус хуулийг санаачлагч Жинни Андерсен

Нийгэмд нээлттэйгээр яригддаггүй олон сэдвийн нэг нь хэвлий дэх хүүхдээ алдах явдал юм. Эцэг эхчүүдэд ганцаараа биш гэдгийг нь мэдүүлэхээр алдартнууд өөрсдийн түүхээс хуваалцах болжээ. Дээрх асуудал нь итгэл найдвар тээсэн хосуудын хувьд гай зовлон ч гэлээ үүнээс болж ичиж санаа зовох, ганцаардах ёсгүй юм. 

Бэлтгэсэн: Б. Уранзаяа

Ub.life 2021.04.06