2 мин

Л.Энхсайхан: Ажлын байрандаа бие биерүүгээ харж өдрийн цайгаа уух нь эрсдэлийг нэмэгдүүлж байна

Э.Намуун 2021.04.19

Сүүлийн 24 цагийн хугацаанд 12384 хүний сорьцод шинжилгээ хийхэд 889 хүнээс коронавирус илэрчээ. Ингэснээр Монгол Улсын хэмжээнд бүртгэгдсэн коронавируст халдварын тохиолдол 22884 боллоо. Мөн хугацаанд 524 хүн эдгэрч, таван хүн нас барсан байна. Өнөөдрийн байдлаар нийт 12401 хүн эдгэрч, коронавируст халдварын шалтгаанаар 49 хүн нас бараад байна.

Мэдээллийн үеэр Эрүүл мэндийн яамны газрын дарга Л.Энхсайхан “Өдөрт тохиолдлын тоо өндөр бүртгэгдэж байна. Манай улс нэг хүнд ноогдох тохиолдлын тоогоор нэлээн өндөр болчихсон. Ер нь халдвараас сэргийлэх эмийн бус аргуудад хатуу хөл хорио тогтоох, гараа угаах, хяналтын сэргийлэлтийг сайжруулах, нэг дор олон хүн цуглуулахгүй байх, аль болох цахим орчинд ажиллах, цахимаар хурал зөвлөгөөн хийх зэрэг багтана.

Хүмүүс ажлын байрандаа бие биерүүгээ харж өдрийн цайгаа ууж, халуун бүлээн амьсгалаар ярилцах үед халдвар тархаж байгаа тохиолдол байна. Маскаа аваад сэрэмж алдаж байгаа болохоор халдвар тархах эрсдэлийг нэмэгдүүлж байна. Мөн хатуу хөл хорионы үеэр хүмүүс олуулаа уулзсанаас гэр бүлдээ халдвар тараах эрсдэл нэмэгдэж байгаа. Хөл хорионы энэ үеэр хүмүүс өөр хоорондоо уулзахгүй байж, халдварын гинжин хэлхээг таслан зогсоох зорилготой. Тиймээс хатуу хөл хориогоо биелүүлж, гэр гэртээ байгаа иргэддээ баярлалаа” гэлээ.

Мөн тэрээр нийт батлагдсан тохиолдлын 20 хувийг хүүхдүүд дангаараа эзэлж байгаа бөгөөд үүний хамгийн өндөр хувийг 10-14 насны хүүхдүүд / 30.7%/ эзэлж байгааг онцлов. 14-өөс доош насны хүүхдүүд уг өвчнөөр хүндэрсэн тохиолдол харьцангуй бага байгаа хэдий ч эрсдэл нь маш өндөр байгаа аж. Дэлхий дахинд хүүхдэд хийх вакцин байхгүй байгаа. Хэрвээ хүүхэд уг өвчнөөр хүндэрвэл зүрх, судас, амьсгалын зам, бөөр болон мэдрэлийн эд эс нь гэмтэх аюултайг санууллаа.

Э.Намуун 2021.04.19