Хэний ч анзаараагүй "Хар Вудсток"
1969 онд саран дээр анх удаа хүн бууж, загварын ертөнцөд дайны эсрэг үзэлтэй залуус энхтайвны тэмдэгтэй цэргийн хүрмээр гоёж, домог болсон “Woodstock” хөгжмийн наадамд 400,000 хүн оролцож байлаа. Тэгвэл яг тэр жилийн зун “Woodstock” болохоос хоёрхон долоо хоногийн өмнө африк гаралтай америкчуудын хөгжмийн соёлыг тэмдэглэх “The Harlem Cultural Festival” ч бас зохиогдсон юм. Тухайн үед хөгжмийн наадмыг зураглаач Хал Тулчин бүрэн эхээр нь буулгаж авсан ч олон нийтийн хүртээл болоогүй байжээ.
Тэгвэл “The Roots” хамтлагийн бөмбөрчин Квестлав (Questlove) цар тахлын хугацааг ашиглан 50 жилийн турш тоосонд дарагдаад байсан бичлэгүүдийг дахин сэргээж баримтат кино бүтээсэн нь энэ жилийн долоодугаар сард нээлтээ хийх юм. “Summer of soul” гэх бүтээл нь хар арьстнуудын түүх соёл, хөгжим болон хувцаслалт гээд тухайн үеийн залуусын амьдралыг тэр л хэвээр нь буулгасан бөгөөд хамгийн эхний трейлер нь өчигдөр Оскарын шагнал гардуулах ёслолын үеэр анх удаа цацагдсаныг та бүхэнд хүргэж байна.
Квестлав Variety сэтгүүлд өгсөн ярилцлагадаа, “Вудсток гэх хотын нэр дангаараа бүхэл бүтэн хөдөлгөөнийг тодорхойлдог. Үүний адил хар арьстнуудад ч бас ийм зүйл тохиосон бол гэж хааяа бодогддог юм. Харлем фестивал тухайн үед Вудстокын адил дэлхий даяар тархаж, олон нийтэд хүрсэн бол хөгжмийн хорхойтнуудын амьдралд ямар өөрчлөлт гарах байсныг бодоод үзээрэй. Тийм л учраас би өөрсдийнhff түүхийг хуваалцахаар энэхүү киног бүтээсэн” гэжээ.
Тус баримтат кино нь энэ жилийн эхээр Сандэнс кино наадамд оролцон шилдэг бүтээлийн шагнал болон үзэгчдийн нэрэмжит шагналыг тус тус хүртсэн байна.
Эх сурвалж: Variety
Бэлтгэсэн: Б. Уранзаяа