Хайх зүйлээ бичнэ үү

10 мин

Зургаадугаар сарын чухал өдөр, ХАЙР ДУРЛАЛЫН ЗУРХАЙ


Зургаан сартай хамт зун "албан ёсоор" эхэллээ! Нимгэн хувцас, нарны шил, зуны төлөвлөгөөгөө гаргацгаах уу? Зөөлөн бороотой, зүрх догдлом халуухан энэ сард биднийг ямар чухал үйл явдал, романс, адал явдал хүлээж байгаа бол? 

Аан бас, сонгуулийн "чухал" өдөртэй сар гэдгийг мартаж болохгүй...

1. Хонь (3/21-4/19)

"Хамгийн шилдэг сар болох нь, хонь минь" гэж хэлж чадахгүй нь дээ... уучлаарай. Гэвч таныг амар амгалан, өөрийгөө чагнасан, намуухан тайван сар хүлээж байна. Бужигнаан дунд ч уужуу тайван байж чаддаг хонийн ордныхон энэ сард удаан төлөвлөсөн ажлаа бүтээж, шинэ ажил эхлүүлж, найз нөхдийн харилцаагаа бататгах болно. Сарын дундуур таны өдрүүд бага зэрэг "донсолж" мэдэх бөгөөд гэнэтийн шийдвэр гаргахад хүрнэ. Хайр дурлалын төлөө тэмцэх, эсвэл зөнгөөр нь тавьж явуулах. Хуучин дурлалаа сэргээх, эсвэл цоо шинэ харилцаа эхлүүлэх. Аль ч шийдвэрийг гаргасан та өөрийнхөө төлөө гэдгийг бүү мартаарай. Ажил төрөл, хичээл сурлагын хувьд өөрийгөө дайчлах нь сарын төгсгөлд томоохон амжилтад хөтлөх болно. Дархлаагаа дэмжин, дасгал хөдөлгөөн хийх нь өөртөө итгэх итгэлийг нэмэгдүүлнэ. Крашаа болзоонд урих цаг! 

Сонгуулийн өдөр санах үг: "Яарвал даарна"

Энэ сарыг тодорхойлох түлхүүр үгс: Шийдвэр, аяга цай, дулаахан хөнжил, таатай гэхдээ гашуун. 

2. Үхэр (4/20-5/20)

Эхлэл ба төгсгөл. Таны зүрх сэтгэлдээ хадгалж буй бүхэн үнэхээр хэрэгтэй эсэхийг тунгаах цаг. Таныг бухимдуулж, шаналгаж, зовоож, цаг үрж байгаа аливаа асуудал, харилцааг тавьж явуулахад хамгийн таатай цаг энэ сарын 8,9-ний өдрүүд байх болно. Хэрэгцээгүй зүйлийг өөрөөсөө чөлөөлснөөр сайн сайхан харилцаанд зай гарна. Таныг дутагдалтай болгож буй зүйл өөрөө давтагдашгүй шинж чанар болохыг та ойлгоно. Энэ сард хайр дурлалын харилцаа төдийлөн өөрчлөгдөхгүй боловч өөрийн санаачлагатай байж шинэ алхам хийж, сонин содон болзоонд явахыг хүснэ. Бүх зүйл өөрөөс шалтгаалдаг, ирээдүй өнөөдрийн сонголтоос бүтдэгийг санаарай. Цалингаа нэмэгдүүлэх, удаан төлөвлөсөн аялалдаа явах, нүүх зэрэг чухал шийдвэрүүдэд нээлттэй хандаад үзээрэй. 

Сонгуулийн өдөр санах үг: "Эзэн хичээвэл заяа хичээнэ" 

Энэ сарыг тодорхойлох түлхүүр үгс: Зөөлөн чихэр, үүлс, гэнэтийн аадар, гоёмсог шүхэр, болзоо

3. Ихэр (5/21-6/20)

Нэг л зүйлийг танд хэлэхийг зөвшөөрнө үү. Та өөрийн гэсэн хүчтэй! Ихрийн ордны хүчирхэг чанар биеийн, сэтгэлийн, оюун ухааны гээд бүхий л байдлаар илэрдэг. Сарын эхээр өөрийн хүч чадлаа юунд зарцуулахдаа анхаарууштай. Эс бөгөөс сарын эцэс гэхэд өөртөө харамсаж нэг л мэдэхэд бүтэн сарыг үр бүтээлгүй өнгөрүүлсэн байх болно. Хосын харилцаандаа сэтгэл дундуур байвал мэргэжлийн хүний тусламжийг авах нь таатай уур амьсгалыг эргүүлэн авчрах болно. Ганц бие ихрүүдийн зургаадугаар сар догдлол, шохоорхол, гэнэтийн болзоогоор дүүрэн байна. Бусдаас авахыг хүсдэг зүйлээ өөрөө өгч сурах нь тогтвортой романтик харилцааны эхлэл юм. Тиймээс энэ сар хайртдаа санаачлага гаргаж, сэтгэлд дулаахан болзоонд уриарай. 

Сонгуулийн өдөр санах үг: "Их бүү хий. Бага бүү хий. Өдөр бүр хий"

Энэ сарыг тодорхойлох түлхүүр үгс: Давтлага, хичээл зүтгэл, үр дүн, амралт, сүүн зайрмаг 

4. Мэлхий (6/21-7/22)

Адал явдлаар цангасан мэлхийн ордныхны "нар" энэ сард л гарах нь ээ. Хүсэн хүлээсэн болзоондоо явж, зоримог алхам хийж, романтик харилцаа эхлүүлэхэд таатай сар. Хостой мэлхийнүүдийг халуун дулаан үдшийн болзоо, нэгнээ гэх хайр халамж хүлээж байна. Жижигхэн зүйлсээс аз жаргал мэдрэх дуртай зөөлөн сэтгэлтэй энэ ордныхон хэн нэгний хэрэггүй үгээс болж шаналж болзошгүй. Өөртөө итгэлтэй байж, хийж буй зүйлдээ үзэл бодлоо хамгаалснаар үүнийг даван гарах болно. Ажил мэргэжлээсээ багахан халих, өөр салбарт хүч үзэхийг хүснэ. Амжилт бүхний ард уйгагүй хичээл зүтгэл байдгийг санаарай. Сарын сүүлээр амралтаа авч, эмчийн үзлэгт хамрагдаж, гэр бүлдээ цаг гаргах нь эрүүл мэндэд тустай. Ойр дотны хүмүүстэйгээ зуны үдшийг аятай таатай өнгөрүүлэхэд анхаараарай. 

Сонгуулийн өдөр санах үг: "Одоо эсвэл хэзээ ч биш!"

Энэ сарыг тодорхойлох түлхүүр үгс: Танихгүй охин/залуу, нозоорол, мөстэй кофе, алхалт, дулаахан модод 

5. Арслан (7/23-8/22)

Цоо шинэ сард бэлэн үү? Зоримог, өөртөө итгэлтэй, гал шиг дүрэлзсэн арслангууд энэ сард эрч хүчээрээ эргэн тойрноо байлдан дагуулах болно. Гал асааж, өөрчлөлт хийж, олон хүмүүст танигдахад таатай сар. Гэхдээ асаасан галаа өөрөө унтраах хэрэгтэйг санаж, амралт, амсхийх зав чөлөө олгохоо мартуузай. Хайр дурлалын харилцаанд ч аз одтой байх нь ээ! Гэнэтийн болзоо, гэмгүйхэн үдшүүдэд бэлтгэлтэй байх нь өөртөө итгэх итгэлийг нэмэгдүүлнэ. Адал явдалд нээлттэй байгаарай. Өөртөө цаг гаргаж, багахан хүчилж, хийхийг хүсдэг зүйлсээ чин сэтгэлээсээ оролдоод үз. 

Сонгуулийн өдөр санах үг: "Хэлэхэд амар хийхэд хэцүү"

Энэ сарыг тодорхойлох түлхүүр үгс: Халуун нар, сэрүүн салхи, шөнийн парк, үнсэлт

6. Охин (8/23-9/22)

Өнгөрсөн саруудад хуримтлуулсан эрч хүчээ захиран зарцуулах таатай сар иржээ. Сарын 15-аас эхлэн эрч хүч дундрах төлөвтэй тул сарын эхээр төлөвлөсөн ажлуудаа "базаад" аваарай. Шалгалтад бэлтгэх, бие даан суралцах нь ирээдүйд томоохон үр дүнд хүргэх болно. Өнөөг хүртэлх хайр дурлалын харилцааг тань гурав хувааж болмоор: Таны, түүний, бодит байдал дээрх. Тиймээс энэ удаа аль аль талдаа ижилхэн мэдрэмж, догдлол тээж буй эсэхийг лавлаарай. Харилцааг тодорхой байлгаж, за бол за, үгүй бол үгүй гэх шулуухан харилцааг баримтлах нь цаашид тустай. Хостой охинууд энэ сарын 8-нд онцгой анхаарч, үл ялиг маргаанаас болж муудалцахаас зайлсхий. Эс бөгөөс сарын сүүлээр харилцаа улам ч дордох болно. Чин сэтгэлээсээ ярилцаж, нэгэндээ цаг гаргах нь харилцаанд өглөөний салхи шиг дутагдаж байна. 

Сонгуулийн өдөр санах үг: "Өөрийнхөөрөө" 

Энэ сарыг тодорхойлох түлхүүр үгс: Сэвшээ салхи, шатам нар, яруу тансаг уран зохиол, шүлэг, гоё зураг

7. Жинлүүр (9/23-10/22)

Буй бүхний тэнцвэрийг тогтоогч жинлүүрхэн минь, шинэхэн сар хэдийн эхэлжээ. Энэ сард ч ажил амьдралаа зохицуулж, хүссэн үр дүндээ хүрэхийг хүсвэл өөртөө найдаарай. Хамт олондоо урам хугарч мэдэх тул өөрийн ур чадвартаа найдах нь амжилтад хүргэнэ. Зарим уулзалтад очихгүй байх, заримдаа "Үгүй" гэж хэлэх, заримдаа муу байх нь хэвийн гэдгийг хүлээн зөвшөөрөх нь тустай. Хосын харилцаандаа шинэ алхам хийхийг төдийлөн хүсэхгүй. Хайртдаа гэнэтхэн уурлахаас зайлсхийж, халуун дотно хандахаа мартуузай. Харилцаагаа сайжруулахыг хүссэн хэн ч бай хүссэн зүйлээ авахаас гадна та илүү хүчтэй, итгэлтэй, сэтгэл татам байх болно. Завгүй сар байж мэдэх ч сонгуульд санал өгөхдөө заавал цаг зав гаргаарай.

Сонгуулийн өдөр санах үг: "Өөрийн бодол өөртөө зөв"

Энэ сарыг тодорхойлох түлхүүр үгс: Гашуун кофе, шоколад, их ажлын дараах амралт, халбага хайр

8. Хилэнц (10/23-11/21)

Өөрийн гэсэн хүрээллээ бий болгох дуртай хүчирхэг хилэнцүүдэд захих энэ сарын од эрхсийн зөвлөгөө: Алдаа боломжийг бүтээдэг. Хайр дурлал, ажил хэрэг, хичээл сурлага гээд юунд ч алдаа гаргахаа бүү ай. "Тэнэг" зоригтой байж, том зүйлсэд тэмүүлэх нь сарын дундуур амттайхан үр дүнд хүргэнэ. Найз нөхдөдөө цаг гаргаж, туслалцаа хэрэгтэй байгаа эсэхийг нь асуу. Хэцүү үед нь хамт байж, баяр хөөрийг хуваалцах нь танд өөрт ч таатай байх болно. Хайр дурлалын харилцаанд урам хугарч мэдэх тул анхнаасаа л аливаа өндөр хүлээлт бүү үүсгэ. Эс бөгөөс сарын сүүл гэхэд өнөө л асуудлууд хэвээрээ байх болно. Эрүүл мэнд, сэтгэл зүйдээ анхаарч "чанартай" цагийг өнгөрүүлээрэй. Удаан хугацаанд хэл чимээгүй байсан хэн нэгнээс сэтгэл догдлом зурвас хүлээн авна. 

Сонгуулийн өдөр санах үг: "Айвал бүү хий, хийвэл бүү ай"

Энэ сарыг тодорхойлох түлхүүр үгс: Краш, зурвас, захидал, гэнэхэн болзоо, айдас, догдлол 

9. Нум (11/22-12/21)

Юм бүхнийг төгс байлгахыг хүсдэг нумууд энэ сард онилсон "бай"-аа оносон шиг онох болно. Өөрт таатай боловч худал хуурмаг мэдрэмжид итгэсээр байх уу, эсвэл хатуу үнэнтэй эвлэрч хайр дурлалаа тавьж явуулах уу? гэх хүндхэн сорилттой тулгарна. Гэнэтийн шийдвэр гаргалгүй бодож тунгаан, сарын 3-р үе хүртэл харзнаарай. Сарын 11-ний баасан гарагт дархлаа муудаж, од эрхсийн байрлалаас шалтгаалан сэтгэл санаа муудах төлөвтэй тул өөртөө анхаарч, ая тухтай өнгөрүүлэхийг хичээгээрэй. Сарын 15-нд эргэн тойрноосоо тусгаарлагдсан мэдрэмжид автах тул өөрийн бодлоо ахин эргэцүүлж, бясалгал хийх нь үр дүнтэй. 

Сонгуулийн өдөр санах үг: "Нэг хаалга хаагдахад нөгөө хаалга нээгддэг"

Энэ сарыг тодорхойлох түлхүүр үгс: Гээсэн цоож, нууцлаг ертөнц, адал явдалт зохиол, сонирхолтой болзоо, халуун шоколад

10. Матар (12/22-1/19)

2021 оны зорилтоо эргэн харж, дутуу зүйлсээ гүйцээх завгүй сар эхэллээ. Бодож төлөвлөх дуртай матрын ордныхон хариуцлагатай, өөрийн гэсэн үзэл бодолтой хүмүүс байдаг. Энэ сард төрөлх ажилч хичээнгүй байдал нэмэгдэх тул ажил амралтаа зохицуулахад анхаараарай. Хайр дурлалын хувьд өөр өөр нөхцөл байдалд таныг сорьсон сар байх болно. Хайртай хүнтэйгээ хамт өөр өөр болзоонд явснаар нэгнээ илүү их танин мэдэж, улмаар сарын сүүлд цаашид хамт байх хүмүүс мөн эсэх чухал шийдвэрийг гаргана. Сайхан ном уншиж, өөртөө амар амгалан цагийг бүрдүүлэх нь сэтгэл зүйн эрүүл мэндэд тустай. Адал явдал таныг хүлээж байна. 

Сонгуулийн өдөр санах үг: Эргэлзээ төрж л байвал буруу гэсэн үг 

Энэ сарыг тодорхойлох түлхүүр үгс: Зүүд мөрөөдөл, төлөвлөгөө, тэмдэглэлийн дэвтэр, шингэх наран, үдшийн бороотой болзоо

11. Хумх (1/20-2/18)

Оны эхний хэдэн сарыг гэртээ өнгөрүүлсэн хумхуудын зургаадугаар сар төлөвлөсөн ёсоор адал явдалтай байх нь. Тиймээс шинэ аяллын төлөвлөгөө боловсруулж, ойрхон салхинд гарч, уул модоор зугаалахдаа бэлтгээрэй. Төрөлхийн байгальд ойр, халуун дулаан зан чанартай хумхууд хүрээлэл сайтай, үргэлж найз нөхдөөр хүрээлүүлэн байдаг. Тиймээс найзтайгаа хамт чанартай цагийг өнгөрүүлж, дурсамж болон мөрөөдлөө хуваалцах нь мартагдашгүй дурсамжийг үлдээх болно. Хайр дурлалын хувьд, хостой хумхууд нэгэн хэвийн байдлаас залхсан бол харилцаандаа багахан "халуухан" зүйл нэвтрүүлж, шинийг туршаад үзээрэй. Ганц биечүүд удаан хугацаанд "хоёрын хооронд" байсан харилцаандаа цэг тавих таатай сар байх болно. Учир нь сарын төгсгөлийн 10 хоногт таныг шинэхэн дурлал хүлээж байна. Шүүрээд аваарай. 

Сонгуулийн өдөр санах үг: "Өөрийн хүчээр хийсэн зүйл илүү амттай"

Энэ сарыг тодорхойлох түлхүүр үгс: Сандрал, үнсэлт, маргаан, гаатай шоколад, үдшийн кино болзоо

12. Загас (2/19-3/20)

Зургаадугаар сар цоо шинэ эхлэл байх болно! Хэзээ хэзээнээс илүү их өөрчлөлт хийж, уйгагүй хөдөлмөрлөсөн үр дүнгээ хүлээн авна. Сарын эхний 10 хоног эдгээр өөрчлөлтөөс хамаарсан догдлолоор дүүрэн өнгөрөх бол дараагийн 10 хоногт шинэ амьдралдаа дасан зохицож амар амгаланг эдлэх болно. Бүтээлч байдал, уран бүтээлийн онгод хийморь ивээх нь дээ, загасхан минь. Энэ цаг мөчийг ашиглан өөрийгөө чадах чинээгээрээ дайчлаад аваарай. Хайр дурлал гэхээс илүүтэй өөрийн ажил бүтээлээсээ таашаал, урам зориг авах сар айсуй. Гэхдээ сэтгэлд дулаахан санагддаг хэн нэгнээс ирсэн болзооны санал яаран татгалзах хэрэггүй. Хостой загасууд урин дулаан цагийг ашиглан болзож, романтик "сүнс"-ээ хооллоод аваарай. Шинэ содон зүйлд нээлттэй байж, адал явдалд гарах болно. 

Сонгуулийн өдөр санах үг: "Амьдрал сонголтоор дүүрэн"

Энэ сарыг тодорхойлох түлхүүр үгс: Өөр, уянгалаг, тэврэлт, үд дундын нар, уран бүтээл, зураг, кино, амттай хоол, үдшийн болзоо


Хамгийн их уншилттай
1
2021.09.24
"Squid Game" кинотой холбоотой хамгийн хөгжилтэй 16 пост
2
2021.09.28
"Squid Game" киноны жүжигчин И Жон-жэгийн тухай 14 сонирхолтой баримт
3
2021.09.28
Габби Петитод юу тохиолдов? | Түүний хэргээс суралцах хортой харилцааны тухай 10 зүйл
холбоотой мэдээ
1
1 цагийн өмнө
Уйлангаа инээмээр санагдуулах шинэ MacBook Pro-той холбоотой 11 МИЙМ
2
1 цагийн өмнө
Марвелын шинэ зургаан киноны нээлт хойшилж, хоёр киноны хугацаа тодорхойгүй боллоо
3
2 цагийн өмнө
Өнөөдөр "Squid Game"-ийн жүжигчин У Ён-сугийн төрсөн өдөр буюу түүний тухай 5 баримт
санал болгох
1
1 цагийн өмнө
Уйлангаа инээмээр санагдуулах шинэ MacBook Pro-той холбоотой 11 МИЙМ
2
1 цагийн өмнө
Марвелын шинэ зургаан киноны нээлт хойшилж, хоёр киноны хугацаа тодорхойгүй боллоо
3
2 цагийн өмнө
Өнөөдөр "Squid Game"-ийн жүжигчин У Ён-сугийн төрсөн өдөр буюу түүний тухай 5 баримт

Энэ мэдээнд өгөх таны сэтгэгдэл?
0
0
1
0
0
0
0
0

Сэтгэгдэл бичих (1)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.

Жужуужу 2021.06.06 202.126.89.148

Сарын 3р үе гэж юуг хэлээд байгаа юм болоо ?

0 Хариулах