2 мин

Охин хүүхэдтэй эцэг эхчүүд салах магадлал илүү байдгийг судалгаагаар нотолжээ

О.Анхзаяа 2021.09.16

АНУ-д 1980-аад оны үеэс хэд хэдэн судалгаа явагдаж, хосуудын эхний хүүхэд хэрэв охин байвал салалт илүү их байдаг тухай хэд хэдэн баримт гарч байжээ. Economic Journal сэтгүүлд хэвлэгдсэн судалгаа энэ тухай илүү дэлгэрэнгүй судалсан байна. Мельбурнийн их сургуулийн багш, "Охид ба салалт" гэх номын зохиолч Жан Кабатек болон Жиоржагийн их сургуулийн багш Дэвид Рибар нар номондоо үнэхээр охин хүүхэд АНУ дахь салалтын эрсдэлийг нэмэгдүүлдэг гэж бичжээ. Гэхдээ энэ нь зөвхөн айлын анхны хүүхэд нь өсвөр насан дээрээ яваа охин хүүхэд байх үед эрсдэл их байдаг гэнэ. 12-оос бага насны охид дээр салалт тийм ч их хамааралгүй байдаг.

Нидерландын сүүлийн 10 жилийн 2 сая гаруй гэрлэлтэд хийсэн судалгаагаар өсвөр насны охидтой гэр бүл салах нь их байдаг гэж гарсан ч эцэг нь эгч эсвэл эмэгтэй дүүтэй өссөн үед энэ эрсдэл хавьгүй бага байдаг гэнэ.

Тус эрсдэл охидыг 15 настай байхад хамгийн өндөр түвшинд хүрдэг бөгөөд салах магадлал нь эрэгтэй хүүхэдтэй ээж аавуудаас даруй 10 гаруй хувиар нэмэгддэг.

Энэ нь хэд хэдэн шалтгаантай гэжээ. Зарим гэр бүлүүд соёлын хувьд, нийгмийн байдлын хүрээнд эрэгтэй хүүхэдтэй байхыг илүүд үзэх нь бий. Мөн өөр нэгэн шалтгаан нь эрэгтэй хүүхдүүдийн хувьд эцэг нь илүү үлгэр жишээ байх ёстой гэх бодлын дагуу эрчүүд гэрлэлтдээ илүү хичээх, сэтгэлээ зориулж, хичээл зүтгэл гаргах хандлагатай гэнэ. Гэвч шалтгаан яг юу давамгайлж байгаа дээр бүрэн дүүрэн баримттай хариулт байхгүй.

Охин хүүхэдтэй эцэг эх хүүхдээ хэрхэн өсгөх дээр зөрөлдөх нь их байдаг учир маргалдах, хэрэлдэх үе илүү олон тохиолддог гэсэн таамаглал ч бий. Бас өсвөр насны охид ээжтэйгээ биш аавтайгаа илүү хэцүү харилцаатай байдаг, өсвөр насны явцад тэд аавдаа хамгийн хэцүү хандлага гаргадаг гэнэ.

Тус нийтлэлийг Economist.com сайтаас орчуулан хүргэв.