Маскгүй хүмүүсийг албадан буулгахад онгоц даяараа дуулж эхэлжээ
"American Airlines" онгоцонд маскгүй орж ирсэн гурван зорчигчийг онгоцноос албадан буулгах үед бусад зорчигчид нэгэн зэрэг уухайлан дуулж эхэлжээ. Өнгөрсөн баасан гарагт /2021.09.17/ Миамигийн нисэх буудалд уг үйл явдал болсон бөгөөд гурван зорчигч маск зүүхээс татгалзаж, удаа дараа эсэргүүцэл үзүүлсний улмаас нислэг 9 цагаар хойшлоход хүрсэн гэнэ. Орон нутгийн мэдээллээр, үүнээс ч удсан байх магадлалтай. Маск зүүхээс татгалзсан зорчигчдын хэн нь ч коронавирусийн эсрэг вакцинжуулалтад огт хамрагдаагүй байжээ. Бусад зорчигчид албаны хүмүүсийн шаардлагыг дэмжин өнөөх зорчигчдыг маскаа зүүхийг шаардсан ч хүлээж аваагүй гэнэ. Тэднийг онгоцноос албадан буулгах зуур суудлаа эзэлсэн бусад зорчигчид "Хэй, хэй, хэй, баяртай!" хэмээн дуулцгааж байв.
Он гарснаас хойш АНУ-д маск зүүхээс татгалзах иргэдийн тоо эрс нэмэгдсэн бөгөөд халдвар хамгааллын дэглэмийг чандлан барихын тулд тус улсын Засгийн Газрын зүгээс маск зүүгээгүй иргэдэд шаардлага тавих, хэрэгцээтэй үед албадан хариу арга хэмжээ авахыг албан байгууллагуудад зөвшөөрчээ.
Эх сурвалж: Independent