1 мин

Ковидын вакцин жирэмслэлтэд сөрөг нөлөөгүйг батлах шинэ судалгаа гарчээ

Ub.life 2021.11.26

Ковидын вакцин нь жирэмслэлтийн үед ямар нэгэн сөрөг нөлөөгүй болохыг саяхны судалгаа харуулж байна гэж Их Британийн Эрүүл мэндийн аюулгүй байдлын агентлаг мэдэгджээ.

Их Британи өнгөрсөн дөрөвдүгээр сарын дунд үеэс эхлэн жирэмсэн эхчүүдийг Pfizer, Moderna-ийн вакцинд хамрагдахыг зөвлөж эхэлсэн бөгөөд наймдугаар сард амаржсан эмэгтэйчүүдийн 22 хувь нь дор хаяж вакцины нэг тунгаа хийлгэсэн байжээ. Вакцинд хамрагдсан болон хамрагдаагүй жирэмсэн эмэгтэйчүүдийн дунд амьгүй, дутуу төрөлт ижил түвшинд байгаа нь тус судалгааны үр дүнгээр ажиглагдсан байна. Тодруулбал, 2021 оны нэгдүгээр сараас наймдугаар сарын хооронд бүртгэгдсэн

Нийт амьгүй төрөлт:

Вакцин хийлгэсэн 1000 эмэгтэй тутамд 3.35
Вакцин хийлгээгүй 1000 эмэгтэй тутамд 3.6

Бага жинтэй төрсөн хүүхдүүдийн эзлэх хувь:

Вакцин хийлгэсэн эмэгтэйчүүдийн 5.28%
Вакцин хийлгээгүй эмэгтэйчүүдийн 5.36%

Дутуу төрөлтийн эзлэх хувь:

Вакцин хийлгэсэн эмэгтэйчүүдийн 6.51%
Вакцин хийлгээгүй эмэгтэйчүүдийн 5.99% байжээ.

Судалгаанаас үзэхэд коронавирусийн халдварын улмаас эмнэлэгт хэвтсэн таван эмэгтэй тутмын нэг нь хүүхдээ хугацаанаасаа эрт төрүүлсэн, дутуу төрсөн хүүхдүүдийн зарим нь эрчимт эмчилгээ хийлгэх шаардлагатай байсан гэжээ.

Түүнчлэн жирэмсэн эх коронавирусийн халдвар авсан тохиолдолд ураг амьгүй төрөх эрсдэл өндөр болохыг баримтууд харуулж байна. Иймд жирэмсэн эмэгтэйчүүд вакцин хийлгэхээс санаа зовох шаардлагагүй бөгөөд жирэмсний үеийн ковидын ноцтой үр дагавраас урьдчилан сэргийлэхэд вакцин тус болно гэж Их Британийн Эрүүл мэндийн аюулгүй байдлын агентлагийн Дархлаажуулалтын албаны тэргүүн мэдээлжээ.

Эх сурвалж: BBC