Хатуу хөл хорионд орсон Шиань хотын иргэд эд зүйлсээ хүнсээр сольж байна
Арванхоёрдугаар сарын 23-аас хойш хатуу хөл хорионд ороод байгаа Хятадын Шиань хотын иргэд хүнсний хомсдол үүсэхээс болгоомжлон эд зүйлс, барааг хүнсээр солилцож байна. Иргэд тамхийг байцаагаар, аяга таваг угаах шингэнийг алимаар, ариун цэврийн хэрэглэлийг ногоогоор солилцож буй бичлэг, постууд Хятадын олон нийтийн сүлжээнд тархжээ.
Шиань хотын захиргаанаас айл өрхүүдэд үнэгүй хүнс тарааж байгаа ч олон нийтийн сүлжээнд иргэдийн гомдол гарсаар байгаа юм.
Ван гэх иргэн "Хүмүүс идэх хоолгүй болсон учраас байрны оршин суугчидтайгаа байгаа эд зүйлсээ хоол хүнсээр солилцож байна" гэж Чөлөөт Ази радиод ярьжээ.
Хятадын эрх баригчид ковидын тэг тохиолдолтой байх стратегийг баримталж, өнгөрсөн хугацаанд иргэдээ вакцинд хамруулах, тогтмол шинжилгээ хийх, улс даяар иргэдийн шилжилт, хөдөлгөөнийг хянах зэрэг цогц арга хэмжээг авч ирсэн. Түүнчлэн ирэх сард Бээжинд болох өвлийн олимптой холбоотойгоор хяналтаа улам чангатгасаар байгаа юм.
Тухайлбал, саяхан 1.1 сая хүнтэй Южоу хот шинж тэмдэггүй ковидын гурван тохиолдол илэрсний улмаас хотыг нэг шөнийн дотор хааж, хөл хорио тогтоожээ. Хотын тээвэр, үзвэр үйлчилгээний газруудыг хааж, бараг бүх төрлийн тээврийн хэрэгслийг замын хөдөлгөөнд оролцохыг хориглоод байна.
Эх сурвалж: BBC