1 мин

'Squid Game'-ийн уран бүтээлчид Алтан бөмбөрцөгт оролцохгүй

Б.Саруул 2022.01.07

2

Өнгөрөгч онд дэлхий дахинд шуугиан тарьсан "Squid Game" цуврал 79 дэх удаагийн Алтан бөмбөрцөг кино наадмын хэд хэдэн төрөлд нэр дэвшээд байгаа билээ. Гэсэн ч киноны найруулагч Хван Дун Хюк, нэр дэвшсэн жүжигчид болох Ли Жүн Жэ, О Ён Сү нар шагнал гардуулах ёслолд оролцохгүй юм байна. 

Жүжигчин Ли Жүн Жэгийн харьяалагддаг Артист компани лхагва гарагт хийсэн мэдэгдэлдээ, Ли хэд хэдэн нөхцөл байдлын улмаас энэ жилийн ёслолд оролцохгүй байхаар шийдсэн гэжээ. Тодруулбал, Netflix уг цувралыг Алтан бөмбөрцөгт нэр дэвшүүлээгүй, ковидын тархалт, гадаад болон дотоодод тогтоосон хорио цээрийн дэглэм зэргийг шалтгаалан ийм шийдвэр гаргасан аж.

Энэ жилийн Алтан бөмбөрцөг наадамд "Squid Game" цувралын Сон Ги Хуны дүрд тоглосон Ли Жүн Жэ Телевизийн олон ангит киноны шилдэг жүжигчин, О Ил Намын дүрд тоглосон О Ён Сү Шилдэг эрэгтэй туслах дүр, "Squid Game" кино Телевизийн шилдэг цувралд тус тус нэр дэвшээд байна. 

Өнгөрсөн жил Алтан бөмбөрцөг наадмын шүүгчдийн бүрэлдэхүүн арьс өнгөний олон янз байдлыг тэнцвэртэй хангаагүй, ёс зүйн зөрчил гаргасан гэх мэт олон асуудлын улмаас салбарынхны эсэргүүцэлтэй тулгарсан. 

Хэдийгээр албан ёсны бойкот зарлаагүй ч Netflix, Warner Media, Amazon зэрэг олон томоохон контент бүтээгчид шагнал гардуулах ёслолд оролцохоос татгалзаж байгаа аж. Түүнчлэн наадмыг олон жил ивээн тэтгэсэн NBC энэ жилийн ёслолыг шууд дамжуулахгүй гэдгээ мэдэгджээ.

Эх сурвалж: Korea Times

Б.Саруул 2022.01.07

2