1 мин

Хонконгт 11 шишүүхэй коронавирусийн халдвар авсан тул 2000 амьтныг устгана

Г.Сүрэн 2022.01.19 1 1

Мягмар гарагт Хонгконгийн "Little Boss" нэртэй амьтны дэлгүүрт коронавирусийн халдвар гарсан тул 2000 гаруй амьтныг устгахаар болсон тухай "South China Morning Post" мэдээллээ. Тус дэлгүүрийн 23 настай ажилтан коронавирусийн дельта халдвар авсан нь тогтоогдсон бөгөөд шишүүхэйнүүдэд хийсэн шинжилгээгээр 11 эерэг тохиолдол гарчээ. 

Шишүүхэйнүүдийг өнгөрсөн оны арванхоёрдугаар сард Нидерландаас авчирсан бөгөөд амьтнаас хүнд халдсан тохиолдол байж болзошгүй тул ийм шийдвэр гаргасан нь олон нийтийн эгдүүцлийг төрүүлж байна. Учир нь өнөөг хүртэлх судалгаа шинжилгээгээр коронавирус амьтнаас хүнд халдах магадлал маш бага, ховор түвшинд байгаа тул ийнхүү харгис хэрцгийгээр олон тооны амьтныг хомроглон устгах нь хүнлэг бус үйлдэл гэж амьтны эрхийг хамгаалагчид үзэж байна. "Амьтан хүний төлөө золиос болох учиргүй", "Шишүүхэйнүүдийг хамгаал", "Устгах бус эмчил" гэх утгатай хэдэн зуун пост сошиалд цацагдах болжээ. 

Амьтдыг устгахгүй байхыг уриалсан цахим уриалгад одоогоор 20 мянга гаруй хүн гарын үсэг зуржээ. Мөн шинэ жилийн үеэр их хэмжээний амьтан худалдаалагдсан байж болзошгүй тул нарийвчлан шинжилгээ явуулж, үнэхээр амьтад өвдсөн бол устгах бус эмчилгээ хийх нь зөв болохыг иргэд уриалсаар байна. 

Эх сурвалж: South China Morning Post

Г.Сүрэн 2022.01.19