"Бээжин-2022" өвлийн олимпын наадмыг Монголд найман телевиз шууд дамжуулна
"Бээжин-2022" өвлийн олимпын наадам хоёрдугаар сарын 4-өөс 20-ний өдрүүдэд БНХАУ-ын Бээжин хотноо явагдах билээ. Энэ удаагийн өвлийн олимпод Монгол улсаа төлөөлөн Б.Ачбадрах, А.Энхтуул нар гүйлтийн цанын төрөлд өрсөлдөхөөр эрхээ аваад байна. Б.Ачбадрах дөрвөн жилийн өмнө Пёнчаны өвлийн олимпод мөн өрсөлдсөн туршлагатай билээ. Тэшүүр, биатлоны олон улсын холбооноос олимпын эрхийн дахин хуваарилалт хийсний дараа буюу өнөөдөр нэмэлтээр эрх авсан тамирчдыг албан ёсоор зарлах юм. Тус хоёр төрөлд өрсөлдсөн манай тамирчид одоогоор нөөц тамирчны жагсаалтад бүртгэгдээд байна.
"Бээжин-2022" өвлийн олимп болон пара олимпын наадмын тасалбарыг коронавирусын халдварын улмаас олон нийтэд худалдаалахгүй хэмээн зохион байгуулагчид мэдэгдээд буй. Энэ удаагийн олимпын наадмыг Монголд найман телевиз шууд дамжуулахаар эрхээ авчээ. Тухайлбал, МҮОНТ, MNB Спорт суваг, NTV, UBS, ETV, TV9, Eagle, Боловсрол суваг телевиз шууд дамжуулах юм байна.