1 мин

"Алдвал галдана" нөлөөллийн II аяныг эхлүүллээ

У.Чинзориг 2022.03.29

2

Жил бүрийн хавар, намрын улиралд хуурайшилттай, салхи шуурганы дэгдэлд ихэсдэг тул иргэдийн санамсар болгоомжгүй үйлдлээс шалтгаалсан гал түймэр гарах нь олширдог.

Нийслэлийн хэмжээнд 2022 он гарсаар гуравдугаар сарын 28-ны өдрийн байдлаар гал түймрийн 593, аврах ажиллагааны 32, нийт 625 удаагийн дуудлага ирсэн нь өнгөрсөн оны мөн үеийнхтэй харьцуулахад нийт аюулт үзэгдэл ослын тоо 25,2 хувиар өссөн дүнтэй байна. Үүний дотор шар өвсний түймэр 24, ойн түймэр нэг удаа бүртгэгджээ.  

Цаг уур, орчны шинжилгээний хүрээлэнгээс гаргасан цаг агаарын урьдчилан сэргийлэх мэдээллээр IV, V сард агаарын температур Хөвсгөл, Булган, Сэлэнгэ, Төв, Хэнтий, Дорнод, Сүхбаатарын нутаг, Архангайн зүүн хагас, Өвөрхангайн зүүн хойд хэсгээр олон жилийн дунджаас дулаан,  мөн нийт нутгаар хуурайшилтын зэрэг өндөр байх төлөвтэй байна. 

Иймд байгалийн нөөц баялаг, биологийн олон янз байдлыг хамгаалах, ой, хээрийн түймрийн хор хохирлыг таниулах, түймрээс урьдчилан сэргийлэх арга замыг сурталчлах, иргэдийн буруу дадал хандлагыг өөрчлөх, иргэдийг зөв үйлдэлд уриалан оролцоог нэмэгдүүлэх, хууль эрхзүйн мэдлэг мэдээллийг дээшлүүлэх зорилгоор “Алдвал галдана” нөлөөллийн II аяныг өнөөдөр Нийслэлийн онцгой байдлын газраас эхлүүллээ. Уг аян хоёр сарын хугацаанд үргэлжлэх юм.

У.Чинзориг 2022.03.29

2