Хайх зүйлээ бичнэ үү

3 мин

Өнөөдрийн зурвас: Эрүүл саруул шинэ үе эрх баригчдад Үндсэн хуулийн хичээл заалаа


Залуус төв талбайд хоёр өдөр цуглалаа. Худал, хулгайд гүн идэгдсэн Монгол орноос зугтахыг, гадаадад очиж боолын хөдөлмөр эрхлэхийг тэд хүсэхгүй байна. Хүүхдээ тэврээд ирсэн залуухан эцэг эхчүүд тайван жагсаалын утга учир, бэлгэ тэмдэг байлаа. 

Нам бус, элдэв холбооны сэтэр зүүлтгүй энгийн иргэд хүлцэнгүй ноомой байж тэссэнгүй. Тэгэх шалтгаан зөндөө байна. Үнийн өсөлт, шударга бус явдалд сөхөрсөн эцэг эх, гэр бүл, ерөөс цаг үеэ тэд өмгөөлөн, өнөөдрийн итгэл үнэмшил, хүсэл мөрөөдөл нь биежих учиртай ирээдүйнхээ төлөө гэрээсээ гараад энд ирцгээсэн. Нэг л өглөө гэнэтхэн ийм зүйл болоогүй. Энд дэлхийгээр тарсан ковид, Орос-Украины дайн огтхон ч хамаагүй. Бидэнд зөвхөн бидэнд хамаатай өөрийн ужиг асуудал байдаг. Энэ бол ердөө л шударга ёс. 

32 жил өөд уруугүй, зогсоо зайгүй, хайр энэрэлгүй улс орноо тоносон үе үеийн улстөрчдийн эсрэг залуучууд босож байгаа юм. Амьдрах нөхцөлгүй болтлоо хэдэн үеэрээ хууртаж, ашиглах боломжгүй болтлоо залуу насаа хулгайлуулсан гурван сая монголын хоёр саяыг нь гуйлгачин болгосонд л уурлан эсэргүүцээд байгаа юм. Ямар ч ковид, дайн цөлмөж дийлэхээргүй асар их баялаг хэдхэн улстөрч, прокурор, тагнуул-нүүрсчдэд ногддогийг одоо залуус мэддэг болжээ. Үнэнч шударгаар хөдөлмөрлөсөн нь өр зээлэнд дарагдаад, хоол хүнсээ авч хүчрэхгүй байхад хулгай хийж, худлаа ярьж, бөгс долоосон, бусдын боломжийг завшигчид амар жимэр амьдардаг бусармаг явдалд залуус дургүйцээд байгаа юм. Ийм хөгийн нийгмийг үр хүүхдэдээ үлдээхийг жигшин зэвүүцээд байгаа юм. 

Залуус талбай дүүрэн цугласан ч үймээн, хөөрөлд автсангүй. Хонжоо хайгсдад жолоогоо өгсөнгүй, итгэл үнэмшлээ булаалгасангүй. Эрүүл саруул шинэ үеийн эв нэгдэл, тууштай байдал эрх баригчдад Үндсэн хуулийн хичээл заалаа. Энэ удаагийн жагсаал улс төрчдөд сонгогч гэж хэн байдгийг, ямар эрх үүрэгтэйг ойлгуулсан парламентын боловсрол олголоо. Шударга ёсны уриа цуурайтуулж, эв нэгдлийг сахин Засгийн газраас шаардсаныхаа хариуд Ерөнхий сайдаас амлалт сонсож чадлаа. Иргэдээс Ерөнхий сайдад уламжилсныг УИХ одоо яаралтай хуульчилж, хямралын шалтгааныг арилгах алхмуудад шуудрах үлдлээ. 

Үе болгонд шударга нийгэмд аз жаргалтай байхыг хүсэгч залуу үе амьдарсан. Одоо л... гэх хүлээлттэй сонгуулиуд, шударга хүн гэж байдаг бол энэ л... гэж итгүүлсэн улс төрийн лидерүүд 30, 20, 10 жил өнгөрөхөд залуусын найдварыг унтрааж, ямагт төлөө нь байсаар ирсэн хөгжил дэвшил гэдэг зүйл цаг хугацаанд алдуурсан. Гэхдээ цаг хугацаа хүчтэй юм. Цагийн хүрд эргэх бүрт Монголын залуу үе улам ихээр өндийн цөлхжиж өнөөдрийн тэмцэлд нэгдсэн юм шүү. Үүнээс хойш итгэх хэмжүүр, тэвчих хүлээс гэж байхгүй болсон нь энэ цаг ажээ.  

Улаанбаатарын үе үеийн залуусын жаргал зовлонг хуваалцаж, өнөөдөрт дамжин ирсэн хит дуунуудыг жагсагчид төв талбайд гитартай дуулж байлаа. Гитарын аялгуунд хайр дурлал, итгэл сэтгэл, эх орон эгшиглэж, залуусын гэгээнд Улаанбаатарын үдэш намуухан.

Хамгийн их уншилттай
1
2023.01.17
QUIZ: Та хэр зэрэг ТОКСИК хүн бэ?
2
2023.01.17
Хятад эмэгтэй бүх эксээ хуримандаа урьж нэг ширээнд суулгажээ
3
Уржигдар
Сон Жун Кигийн эхнэр Британи жүжигчин Кэти Сондерсийн тухай 7 баримт
холбоотой мэдээ
1
2022.11.18
Өнөөдрийн зурвас: Гэрт ээж, гадаа цас
2
2022.05.24
Өнөөдрийн зурвас: Роман
3
2022.05.13
Өнөөдрийн зурвас: Эр хүний дотор эмээлтэй, хазаартай морь багтах албагүй
санал болгох
1
10 цагийн өмнө
Эмч нарын зөвлөж буй өдрийн турш ус уух 8 энгийн арга
2
14 цагийн өмнө
Майкл Жексоны тухай "Michael" киноны гол дүрийг түүний ҮЕЭЛ ДҮҮ бүтээнэ
3
Уржигдар
"Wednesday"-ийн дүрийг анх бүтээж байсан жүжигчин Лиза Лоринг таалал төгсжээ

Энэ мэдээнд өгөх таны сэтгэгдэл?
3
0
5
0
0
0
0
0

Сэтгэгдэл бичих (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.