Уоррен Баффеттай өдрийн хоол хамт идэхийн тулд 19 сая доллар төлжээ
Нэрээ нууцалсан нэгэн эрхэм домогт хөрөнгө оруулагч Уоррен Баффеттай үдийн зоог барихын тулд 19 сая доллар төлжээ. Энэ нь ядуурал, өлсгөлөнтэй тэмцэж, орон гэргүй хүмүүст туслах чиглэлээр үйл ажиллагаа явуулдаг Glide сан болон eBay-гийн хамтарсан дуудлага худалдаа юм байна.
Тус ашгийн бус байгууллага буяны үйлсэд хөрөнгө босгохын тулд Уоррен Баффеттай үдийн зоог барих дуудлага худалдааг тогтмол зохион байгуулж иржээ. 2019 оны дуудлага худалдааны ялагч, криптовалютын бизнес эрхлэгч Жастин Сун 4,567,888 доллар төлж тухайн үедээ дээд амжилт тогтоож байсан бол сая болсон 21 дэх удаагийн дуудлага худалдаагаар үүнээс даруй дөрвөн дахин өндөр үнэ санал болгосноор дээд амжилтыг эвдээд байна.
eBay-гээс мэдээлснээр дуудлага худалдааны ялагч Нью-Йоркийн Smith & Wollensky Steakhouse-д Баффеттай дээд зэргийн үдийн зоог барих бөгөөд долоо хүртэлх хүнийг зочноор урих боломжтой гэжээ.
Энэхүү буяны дуудлага худалдааг Уоррен Баффетын гэргий Сюзи Баффет 2000 онд анх санаачлан эхлүүлж байжээ. 21 жил үргэлжилсэн уг арга хэмжээ энэ жил сүүлийн удаа зохион байгуулагдаж байгаа нь энэ юм байна.
Эх сурвалж: CNN