Наадмын сорилго барилдаанд Тува болон Итали улсын бөхчүүд зодоглоно
Маргааш 12:00 цагаас Монгол бөхийн өргөөнөө "Мөнхийн Үсэг" группийн 30 жилийн ойд зориулсан "Үндэсний их баяр наадмын сорилго" улс, аймгийн алдар цолтой 256 бөхийн барилдаан болно. Тус барилдаанд зодоглохоор улсын арслан Р.Пүрэвдагва, улсын гарди М.Бадарч, улсын заан Б.Соронзонболд, улсын харцага Б.Орхонбаяр, Н.Золбоо, Б.Цэдэнсодном нарын тэргүүтэй бөхчүүд бүртгүүлээд буй юм. Мөн Тува улсын арслан Кара-Сал Цэдэн-Очир, Итали улсын иргэн Григорий нар барилдахаар бүртгүүлжээ.
Энэ жил Ардын хувьсгалын түүхт ой, Үндэсний их баяр наадамд 1024 бөх зодоглох билээ. Мөн МҮБХ-ны Тэргүүлэгчдийн тавдугаар сарын хурлаар өрсөлдөгч бөхөө санаатай цохиж, зохисгүй үйлдэл гаргасан аймгийн арслан Б.Батсайханы барилдах эрхийг зургаан сараар хасах шийдвэр гаргаад байв. Аймгийн арслан Б.Батсайханаас өөрийн алдаа дутагдалд уучлал хүсэж, дахин ямар нэгэн зөрчил гаргахгүйгээ илэрхийлж өргөдөл хүсэлт ирүүлсэнг харгалзан Ардын хувьсгалын түүхт ойн баяр наадамд Б.Батсайханы барилдах эрхийг сэргээх шийдвэрийг Тэргүүлэгчдийн хурлаас гаргажээ. Ингэснээр аймгийн арслан Б.Батсайханы барилдах эрх өнөөдрөөс сэргэж байгаа юм.
Зочин 2022.06.25 202.9.40.197
Zuw shu olon ulsiin buhchuud barilddag boloh heregtei
0 0 Хариулах