2022 оны Дэлхийн хамгийн царай муутай нохойгоор "Mr. Happy Face" тодорчээ
"Mr. Happy Face" нэртэй чихуахуа нохой өнгөрсөн баасан гаригт болсон 2022 оны Дэлхийн хамгийн царай муутай нохой шалгаруулах тэмцээний ялагч болжээ. "Mr. Happy Face" өмнө нь нохой цуглуулагчийн гэрт маш хүнд нөхцөлд зовж байсан тухай эзэн нь ярьсан бөгөөд мэдрэлийн асуудалтай, хавдар туссан, живх хэрэглэдэг, зогсох болон алхаж бараг чаддаггүй, гилжгий нүүртэй аж.
"Тэр ялагч болох нь анхнаасаа тодорхой байсан" хэмээн тэмцээний шүүгч Дебра Мати хэлсэн бөгөөд "Энэ нохой амьдралд нь тохиолдсон олон зовлонг даван гарсан нь өөрөө гайхамшиг" гэжээ. Уг нохой болон түүний эзэн Женеда Беналли нар 1500 ам.долларын шагнал хүртсэн бөгөөд Нью-Йорк хот руу аялж, "Today" шоунд оролцох урилгын эзэн болсон байна.
Энэхүү тэмцээн 50 жилийн турш тасралтгүй зохион байгуулагдаж байгаа бөгөөд хүнд нөхцөлд байсан нохдыг үрчилж авахыг гол шалгуурынхаа нэг болгодог аж. "Би "Mr.Happy Face-ийг үрчилж авч байсан. Энэ тэмцээн ч нохдыг үрчилж авахыг дэмждэгийн сацуу царай төрхөөсөө үл шалтгаалан бүх л нохой хайрлуулах эрхтэй гэдгийг бусдад ойлгуулдаг нь сайхан санагддаг" хэмээн Женеда Беналли ярьжээ.