Хавдар судлалын Үндэсний төв бүх ажилчдадаа 3 сая төгрөгийн урамшуулал олголоо
Эрүүл мэндийн сайдын 2018 оны А/295 дугаар тушаалаар жил бүрийн VIII сарыг “Эрүүл мэндийн ажилтны нийгмийн хамгааллыг дэмжих сар” болгон баталсны дагуу Хавдар судлалын үндэсний төв албан тушаал үл харгалзан бүх ажилчдадаа гурван сая төгрөгийн урамшуулал олгожээ. Энэ нь ажилчдынхаа нийгмийн баталгааг ханган, ажиллах урам зоригийг нэмэгдүүлэх зорилготой арга хэмжээ аж.
Үүнээс гадна тус төвд хөдөлмөрийн гэрээгээр ажиллаж буй хөгжлийн бэрхшээлтэй ажилтан тус бүрд 670900 төгрөгийн үнэ бүхий эрүүл мэндийг дэмжих багц бүтээгдэхүүнийг нэг удаа олголоо.
Иргэдэд чанартай, сайн тусламж үйлчилгээг үзүүлэхийн төлөө тогтмол цалинтай эмнэлгийн ажилтнуудыг идэвхжүүлэх, бүтээмжтэй, чанартай, үр дүнтэй хөдөлмөрлөснийхөө хэрээр үнэлэгддэг цалин урамшуулал авдаг болох тогтолцоог бий болгохын төлөө ХСҮТ дээрх урамшууллыг олгож буй аж.