Германы парламентын гишүүд чуулганы танхимд суух аргагүй хүйтэн байна гэв
Германы парламент буюу Бундестагийн гишүүд чуулганы танхимд суух аргагүй хүйтэн байна хэмээн гомдол мэдүүлжээ. ОХУ-ын байгалийн хийн нийлүүлэлт зогссоноос шалтгаалан эрчим хүчний хомсдол үүссэн тул Бундестаг эрчим хүч хэмнэх шинэ журамд нийцүүлэн барилгын температурыг 19 градус болтол бууруулсан аж. Бундестагийн гишүүн Ренате Кюнаст дулаан курткатайгаа хуралд сууж, байсхийгээд босож алхлан дулаацсан тухайгаа яриад “Ингээд байхад л нус гоожоод байна. Итгэмээргүй юм!” хэмээн ярьсан байна. Ганц Бундестаг ч биш, Герман даяарх бүх оффист өрөөний температурыг 19 градуст барих журам гаргажээ. Эмнэлэг, хүүхдийн болоод өндөр настны асрамжийн газар, хөгжлийн бэрхшээлтэй хүмүүс ажиллаж, амьдардаг барилга, сургууль, цэцэрлэг энэ журмыг мөрдөхгүй.
Өнгөрсөн наймдугаар сард германчуудын байгалийн хийн хэрэглээ өнгөрсөн оны мөн үеийнхтэй харьцуулахад 22 хувиар бага байв. Германы зарим их сургууль эрчим хүчний хомсдолоос шалтгаалан XII-I сард хичээлээ цахимаар оруулахаар шийдвэрлэжээ.