1 мин

Монголын сагсан бөмбөгийн баг Азийн наадмаас мөнгөн медалийн болзол хангалаа

У.Чинзориг 2023.10.01

Хятадын Ханжоу хотноо Азийн спортын 19-р наадам 9-р сарын 19-нөөс 10-р сарын 08-ны өдрүүдэд зохион байгуулагдаж байна.

Сагсан бөмбөгийн 3х3 төрлийн тэмцээнд өрсөлдсөн Монголын эмэгтэй шигшээ Хонгконг, Йордан, Филиппин, Тайландын багуудыг хожиж хагас шигшээд шалгарсан. Тэд өнөөдөр Тайванийн багтай мөнгөн медалийн төлөө тоглолоо.

Цаг дуусахаас гурван секундын өмнө Ц.Болорцэцэг торгуулийн шидэлтийг амжилттай гүйцэтгэж, улмаар Тайванийн багийг 21:20-оор хожсон Монголын сагсан бөмбөгчид Азийн наадмаас мөнгөн медалийн болзол хангаад байна. Тэд өнөө оройн 20:00 цагаас алтан медалийн төлөө Хятадын багтай тоглоно.

Харин Монголын эрэгтэй шигшээ хэсгийн шатнаа Йордан, Хонгконг, Филиппин, Ираны багуудыг хожиж, Тайваньд хожигдсоноор хагас шигшээд шалгарсан. Тэд мөнгөн медалийн төлөө Катарын багтай тоглосон ч 21:13-аар хожигдсон юм. Улмаар өнөөдөр 19:30 цагаас хүрэл медалийн төлөө тоглоно.