А.Амбасэлмаа: Өчигдөр 212 хүнд шинжилгээ хийхэд бүгдэд нь коронавирус илрээгүй
Эрүүл мэндийн яамнаас ээлжит мэдээллээ хийлээ. Өнөөдрийн байдлаар дэлхийн 216 оронд коронавирусийн халдвар бүртгэгдсэн байна. Шинэ коронавирусийн халдвараар 6 сая 350 мянга гаруй хүн өвчилж, 377 мянга гаруй хүн нас баржээ.
Энэ үеэр ХӨСҮТ-ийн Тандалт, судалгааны албаны дарга А.Амбасэлмаа “Зургаадугаар сарын 1 буюу өчигдөр ХӨСҮТ-ийн хоёр, Дархан-Уул аймгийн салбар лабораторид нийт 212 хүнд шинжилгээ хийсэн байна. Бүгдэд нь коронавирус илрээгүй. Үүнд, тандалтын зорилгоор 3, ХӨСҮТ-д тусгаарлагдсан 8, ажиглах байранд тусгаарлагдсан 1 хүний давтан шинжилгээ, Истанбул-Улаанбаатарын онгоцоор ирсэн зорчигчдын давтан шинжилгээ, Алтанбулагийн боомтоор орж ирсэн 10 жолооч багтсан. Бид ажиглах байранд байгаа хүмүүсийн шинжилгээг ДЭМБ-ын зөвлөмжийн дагуу ирмэгц нь авч, 7, 14, 21 хоногт нь шинжилгээ авч байгаа. Гэрт гарахаар нь 14 хоногийн хугацаанд дахин 2 удаа шинжилгээ авч байна. Зөөвөрлөгдөн орж ирж, батлагдсан нийт 185 тохиолдол байгаагаас ХӨСҮТ-д 141 нь эмчлүүлж байна.
Эмчлүүлэгчдийн ор, хоногийн хугацаа нэлээн урт буюу 14-53, дунджаар 30 хоног байгаа юм. Насны хувьд 5-65. Үүнээс 5-15 насны 5 хүүхэд, дундаж нас нь 24.2 байна. Голчлон эрчүүд өвчилсөн, халдвар авсан хүмүүсийн 65 хувь нь эрэгтэй. Батлан хамгаалахын чиглэлээр сурч байсан оюутнууд халдвар авсантай холбоотой. Халдвартай хүмүүст хоолой, толгой өвдөх, ханиалгах, хамар битүүрэх, халуурах, булчин өвдөх, дотор муухайрах, амьсгал давчдах, ядарч сульдах зэрэг шинж тэмдэг илэрч байна” гэв.