Алдартнууд фэйсбүүк, инстаграмыг эсэргүүцэж, 24 цагийн турш сошиал хаягаа хаажээ
Америкт Stop Hate For Profit хөдөлгөөн хүрээгээ тэлсээр байна. Фэйсбүүк компани хуурамч мэдээлэл, Hate speech буюу үзэн ядсан үг хэллэг бүхий сэтгэгдэл, контентын эсрэг дорвитой алхам хийхгүй байгааг олон нийт шүүмжилсээр байгаа билээ. Үүнтэй холбогдуулан өнгөрсөн долоодугаар сард Адидас, Кока Кола, Форд, Пума, Юнилевер, Хонда, Старбакс тэргүүтэй 242 компани, брэнд бүтэн сарын турш фэйсбүүк дээрх зар сурталчилгаагаа зогсоож, зарим нь сурталчилгаагаа багасгах шийдвэр гаргасан юм.
Тэгвэл өчигдөр Ким Кардашиан Вест, Леонардо Ди Каприо, Женнифер Лоуренс, Орландо Блум, Керри Вашингтон, Марк Руффалло, Сасча Барон Коэн тэргүүтэй алдартнууд бойкот зарлаж, 24 цагийн турш фэйсбүүк, инстаграмын хаягаа хаалаа.
I love that I can connect directly with you through Instagram and Facebook, but I can’t sit by and stay silent while these platforms continue to allow the spreading of hate, propaganda and misinformation - created by groups to sow division and split America apart pic.twitter.com/XkxzABn7qw
— Kim Kardashian West (@KimKardashian) September 15, 2020
Ким Кардашиан Вест "Инстаграм, фэйсбүүкээр дамжуулж та бүхэнтэй шууд холбогдох боломжтой байгаа нь сайхан. Гэвч эдгээр платформ үзэн ядалт, суртал ухуулга, ташаа мэдээллийг түгээх боломжийг олгож байгааг хараад чимээгүй сууж чадахгүй нь. Олон нийтийн сүлжээгээр тарж буй ташаа мэдээлэл сонгуульд ноцтойгоор нөлөөлж, ардчиллыг маань доройтуулж байна" гэсэн постыг сошиал хаягууддаа оруулжээ.
Тус хөдөлгөөнд нэгдсэн бусад алдартнууд ч бас байр сууриа илэрхийлж, дагагчдаа үүнд анхаарал хандуулахыг, Фэйсбүүк компанийг дорвитой шийдэл гаргахыг шаардаж байна.
Холбоотой мэдээлэл: 240 гаруй компани Фэйсбүүкийн эсрэг бойкот зарлаж, зар сурталчилгаагаа татжээ