1 мин

Анжелина Жолигийн "зомби" дүрээр танигдсан Ираны инстаграм одыг баривчилжээ

Б.Саруул 2019.10.07 22 9 2

243

Холливуудын алдарт жүжигчин Анжелина Жолигийн гадаад төрхийг дуурайн анх олонд танигдсан Ираны инстаграмын од Сахар Табарыг баривчилжээ. Түүнийг ариун зүйлсийг гутаан доромжилсон, хүчирхийлэлд турхирсан, зүй бус аргаар орлого олсон, залуучуудыг авлигад уриалсан гэх хэд хэдэн хэрэгт буруутгаж байгаа аж. 

Эдүгээ 22 настай тэрбээр жүжигчин Анжелина Жолитой төстэй болохын тулд 50 гаруй удаа гоо сайхны мэс засалд орсон хэмээн мэдэгдэж, ихээхэн шуугиан тарьж байсан юм. Түүний гадаад төрх Жолитой төстэй ч хонхор нүд, хэлбэрээ алдсан хамар, уруул, цонхигор царай нь сошиал хэрэглэгчдийг цочирдуулж байв. Харин Табар өнгөрсөн долоодугаар сард анх удаа өөрийнхөө жинхэнэ төрхийг олон нийтэд дэлгэж, 50 удаа гоо сайхны мэс засалд орсон гэдэг нь худал болохыг тайлбарлажээ. Тэрбээр уруул, хамартаа мэс ажилбар хийлгэж байснаа хүлээн зөвшөөрсөн ч олон нийтэд танигдсан Жолигийн дүр төрхийг нүүр будалт болон фотошопын тусламжтайгаар бий болгосноо хүлээжээ. 

Инстаграм дагагчид нь түүний энэ үйлдлийг зохисгүй хэмээн үзэж, удаа дараа гомдол гаргаснаар цагдаагийн газраас Сахар Табарыг баривчлахад хүрсэн байна. Мөн түүний инстаграм хаягийг устгажээ. 

Дашрамд дурдахад, Иран улсад фэйсбүүк, твиттер, телеграм зэрэг нийгмийн сошиал сүлжээг албан ёсоор хориглосон байдаг бөгөөд инстаграм л гол сошиал сүлжээ болдог аж. 

Эх сурвалж: BBC

Б.Саруул 2019.10.07

243