Асашёорюү Д.Дагвадоржийн авга дүү жюүрёо зиндаанд дэвшлээ
Монгол Улсын заан Д.Долгорсүрэнгийн том хүү Д.Сугаррагчаагийн хүү Хоошёорюү С.Бямбасүрэн ирэх арвандүгээр сарын башёд жюүрёо зиндаанд дэвшин барилдахаар болжээ.
Түүний авга ах Асашёорюү Д.Дагвадорж мэргэжлийн сүмод зодоглосон 10 дахь тэмцээндээ жюүрёод барилдаж байсан бол Хоошёорюү 11 дэх тэмцээндээ сэкитори болж, жюүрёод барилдахаар боллоо.
Өдгөө 21 настай С.Бямбасүрэнгийн хувьд одоогоос жил гарны өмнө Японыг зорьсон юм. Тэрбээр хэвлэлд өгсөн ярилцлагадаа "Их аварга ахынхаа сүмогийн дэвжээнд гаргасан амжилтыг нь эвдэнэ" хэмээжээ.
Сонирхуулахад, Японы мэргэжлийн сүмод 27 жилийн хугацаанд Монголын 50 гаруй сүмоч зодоглож, дөрвөн их аварга цолтон төрөөд байна.