"Аватар-2": Жэймс Камерон, Кэйт Уинслет нар эргэн нэгдлээ
Оскарын шагналт жүжигчин Кэйт Уинслет "Титаник" киноны найруулагч Жэймс Камеронтой дахин нэгдэж, бүх цаг үеийн хамгийн их ашиг олсон кино бүтээл "Аватар"-ын шинэ ангид тоглож байна. Энэ удаа үйл явдал мөн л устай холбоотой байх нь.
"Аватар" киноны албан ёсны твиттерт зураг авалтын шинэхэн зургийг нийтэлсэн бөгөөд кино багийнхан цөм хүчилтөрөгчийн багтай байхад харин Кэйт зөвхөн хамрын чимхүүртэй харагдаж байна.
"Аватар-2" кинонд тоглохын тулд усан дотор удаан хугацаанд амьсгаагаа түгжиж сурсан. Миний одоогийн дээд амжилт 7 минут 14 секонд. Өөрөө ч итгэж чадахгүй нь" хэмээн жүжигчин Кэйт Уинслет "Hollywood Report"-д өгсөн ярилцлагадаа дурджээ.
Шинэ киноны тухай мэдээлэл одоогоор нууц байгаа бөгөөд чухам ямар дүрд тоглож байгааг нь сонирхсон сэтгүүлчийн асуултад "Би усны хүн" хэмээн товчхон хариулжээ.
"Аватар-2" кино 2022 оны арванхоёрдугаар сарын 16-нд нээлтээ хийх тов гарсан. Мөн 2024, 2026, 2028 онд дахин шинэ гурван анги хийгдэх төлөвлөгөө байгаа аж.