1 мин

Баян-Өлгий аймгийн Цагааннуур, Увсын Боршоо боомтыг 21 хоногийн хугацаанд хаана

Э.Намуун 2020.10.30

Засгийн газрын ээлжит бус хуралдаан болж, зарим хилийн боомтыг түр хаах асуудлыг хэлэлцэв. Тус хуралдаанаар Баян-Өлгий аймгийн Цагааннуур, Увс аймгийн Боршоо боомтыг арваннэгдүгээр сарын 2-ноос эхлэн 21 хоногийн хугацаанд хаах шийдвэр гаргасныг Шадар сайд Я.Содбаатар мэдээллээ.

Эрүүл мэндийн сайд Т.Мөнхсайхан энэ үеэр “Коронавирусийн халдварыг дотоодод алдсан тохиолдол байхгүй. Бид тандалт судалгааг байнга хийж байгаа. Санаа зовохгүй байж болно” гээд боомт, хилийн цаана коронавирусийн халдвар эрчимтэй тархаж байгаа талаар онцолж, ард иргэдийг амны хаалтаа зүүж, гараа угаан ариун цэврээ сайтар хангахыг анхаарууллаа.

Боомтоор орж ирсэн жолооч нараас урьд шөнө шинжилгээ хийхэд ОХУ-ын хоёр жолоочоос коронавирусийн халдвар илэрсэн байна. Тус хоёр жолоочийг ОХУ-ын талд хүлээлгэн өгснийг Шадар сайд Я.Содбаатар хэллээ. Мөн баруун зүгийн боомтуудаар ихэвчлэн нефт, ачаа барааг тээвэрлэдэг бөгөөд манай улсад нефтийн бүтээгдэхүүний нэг сарын нөөц байгаа төдийгүй цаашид тодорхой гарагаар зохицуулалт хийж, импортоор оруулж ирнэ гэдгийг хэлсэн юм.

Э.Намуун 2020.10.30