"Black Panther" киноны хоёрдугаар ангийн зураг авалт ирэх онд эхэлнэ
"Marvel"-ийн ээлжит кино бүтээл "Black Panther" зураг авалтаа эхлүүлэх тов гаргаад байна. Хоёрдугаар анги ийнхүү 2021 оны долдугаар сараас зураг авалтаа эхлүүлэх болжээ.
Уг нь ирэх оны гуравдугаар сараас зураг авалт эхлэх байсан ч гол дүрийн жүжигчин Чедвик Боузман харамсалтайгаар таалал төгссөний улмаас ийнхүү хойшлоод байна.
"Hollywood Reporter"-оос мэдээлж буйгаар кино бүтээгчид харуусал гашуудлаа ардаа үлдээж, урагш хөдлөхөөр хичээж байгаа бөгөөд Атланта мужид зураг авалтаа эхлүүлж зургаан сар орчмын хугацаанд үргэлжлүүлнэ хэмээн төлөвлөжээ.
Гол дүрийн жүжигчингүйгээр тэд цааш хэрхэн киног үргэлжлүүлэх нь тодорхой болоогүй ч компьютер график ашиглан дүрийг дахин бүтээхгүй нь гарцаагүй хэмээжээ. Учир нь "Чедвик бол цор ганц. Бид түүнийг компьютер график ашиглан дахин бүтээхгүй" хэмээн Марвел студийн Ерөнхийлөгч хэлсэн юм.