"Бүрэнхий" цувралыг Эдвардын өнцгөөс харуулах "Midnight Sun" ном удахгүй гарна
Өсвөр насны тэрхэн үе Team Edward, Team Jacob гэх хоёр үгийн хооронд өнгөрч байсан санагдаж байна. Нэг бол Эдвард, нэг бол Жэйкобт дурлаж, Бүрэнхий киноны бүх ангийг давтан үзэж, номыг нь элэгдтэл уншиж байсан хүмүүс байна уу?
Тэгвэл та бүхэнд дуулгах сайхан мэдээ байна. Учир нь зохиолч Стефени Мэйер "Midnight Sun" номоо энэ зун гаргах гэж байна.
Эдвард Каллен Форкс хотод дөнгөж нүүж ирээд байсан Белла Своныг анх харж, уулзаж байсан үеийн түүхийг энд өгүүлэх гэнэ. Харин удаан хүлээсэн уг зохиол энэ оны наймдугаар сарын 4-нд худалдаанд гарна!
Анх "Midnight Sun" ном гарах тухай мэдээ бараг л арван жилийн өмнө гарсан байх. Хүн болгон Эдвардын өнцгөөс түүхийг сонирхох хүсэлтэй байсан билээ. Гэвч гар бичмэл нь алдагдан, олонд тарсан хэрэг гарч, түүнээс хойш гарахгүй энэ хүртэл удсан билээ.
Бодол унших чадвартай, урт удаан, нууцлаг амьдралын түүхтэй, дотогшоо хэрнээ багтаж ядсан дур хүсэл, хайрыг мэдэрч шатаж байдаг Эдвард анх Беллатай учраад юу гэж бодсон бол? Түүний цусны үнэр яаж мэдрэгдэж байсан бол? Энэ болгоныг унших боломж эцэст нь нэг олдох нь ээ.
Хэвлэлийн компанийн зүгээс уг номыг "хар бараан өрнөлтэй" хэмээн онцолсноор Эдвардын цусанд шунаж явсан өнгөрснийг тодорхой харуулах нь тодорхой боллоо.