1 мин

АНУ-ын Дотоод хэргийн яам Монгол тэргүүтэй 59 орны оюутны визийг 2 жилийн хязгаартай болгох санал гаргажээ

Б.Саруул 2020.09.25

АНУ-ын Дотоод хэргийн яам тус улсад суралцаж буй гадаад оюутны визийн хугацааг хязгаарлах саналыг боловсруулжээ. Одоо мөрдөгдөж буй журмаар бол оюутнуудын виз төгсөх хүртэл нь хүчинтэй байдаг билээ. Харин шинээр боловсруулсан журамд Ойрх Дорнод, Ази, Африкийн 59 орны оюутнуудын визийг хоёр жил, бусад орны оюутны визийг дөрвөн жилийн хугацаатай болгож хязгаарлахаар тусгажээ. Монгол Улс визний хоёр жилийн хязгаартай орнуудын тоонд багтсан байна.

Шинэ журам хэрэгжиж эхэлбэл гадаад оюутнууд хоёр (зарим нь дөрөв) жил тутамд визээ сунгуулах шаардлагатай болох юм. Мөн энэ нь АНУ-д шинээр ирж суралцах оюутнуудын тоонд нөлөөлнө гэж ажиглагчид үзэж байна.

Ийнхүү визний хугацааг богиносгож буй шалтгааныг АНУ-ын Дотоод хэргийн яам үндэсний аюулгүй байдалтай холбон тайлбарлажээ. Тодруулбал,

АНУ-ын Төрийн департаментаас гаргадаг терроризмыг санхүүжүүлэгч улсуудын жагсаалтад багтсан (Иран, Сири, Судан, Хойд Солонгос гэх мэт)
Мөн визний хугацаагаа хэтрүүлсэн иргэдийн тоо нь 10 хувиас дээш байгаа орнуудыг хязгаарлалтад багтаажээ.

Визээ хэтрүүлдэг хүмүүсийн дийлэнх нь Хятад, Энэтхэг, Бразил, Канадын иргэд байдаг ч эдгээр улс дээрх хязгаарлагтад багтаагүй байгаа юм.

Трампын засаг захиргааны бүрэн эрхийн хугацаа 2021 оны нэгдүгээр сард дуусах тул шинээр боловсруулсан саналыг олон нийтэд танилцуулж, эцэслэн батлахад хэдхэн сар үлдээд байна. Хэрэв ирэх арваннэгдүгээр сард болох Ерөнхийлөгчийн сонгуульд Ардчилсан намаас нэр дэвшигч Жо Байден ялалт байгуулбал оюутны визийг хязгаарлах санал дэмжигдэх эсэх нь эргэлзээтэй юм.

Эх сурвалж: VOX

Холбоотой мэдээлэл: АНУ-д суралцаж буй гадаад оюутнуудтай холбоотой 5 ЧУХАЛ БАРИМТ