1 мин

Дональд Трамп Шимэгч киног Оскарын шилдэг киногоор шалгарсанд эгдүүцэв

Б.Саруул 2020.02.21

Шимэгч киноны уран бүтээлчид Оскарын дөрвөн гол номинацид шилдгээр шалгарч, Академийн түүхэнд анх удаа гадаад хэлээр гарсан бүтээл шилдэг киногоор шалгарсан. Тэгвэл АНУ-ын Ерөнхийлөгч Дональд Трамп 92 дахь удаагийн Академийн шилдэг бүтээлээр тодорсон Шимэгч киног шүүмжилжээ.

Тэрбээр өчигдөр Колорадо мужид сонгогчидтойгоо уулзахдаа "Энэ жилийн Академийн шагнал гардуулах ёслол ямар тааруухан байв аа, үзсэн биз дээ та бүхэн? Шилдэг бүтээл нь Өмнөд Солонгосын кино. Ямар новш нь болоод байгаа юм бэ? Бид Өмнөд Солонгостой гадаад худалдааны тал дээр хангалттай олон асуудалтай байгаа. Гэтэл нэмээд шилдэг киноны шагнал өгчихлөө. Энэ сайн зүйл гэж үү? Би лав хэлж мэдэхгүй байна" гэж ярьжээ.

Мөн тэрбээр хэзээ ч Брэд Питтийн дэмжигч байгаагүй гэдгээ хэлээд амжжээ. Жүжигчин Брэд Питт Оскарын шилдэг эрэгтэй туслахын дүрийн шагналыг гардаж авахдаа "Тэд надад үг хэлэх 45 секунд байгаа гэж хэлсэн. Сенатаас Жон Болтонд үг хэлэхэд өгсөн хугацаанаас ядаж л 45 секундээр илүү юм гээч" хэмээн хошигносон билээ.

Understandable, he can't read.#Parasite #BestPicture #Bong2020 https://t.co/lNqGJkUrDP
— NEON (@neonrated) February 21, 2020

Дональд Трампын шүүмжлэлд Академи болон Шимэгч киноны уран бүтээлчид ямар нэгэн хариу тайлбар хэлээгүй байна. Харин Шимэгч киног дистрибьютор хийсэн Neon компани Трампын үг хэлж буй бичлэгийг твиттерт RT хийхдээ "Ойлгомжтой, тэр уншиж чаддаггүй юм байна" гэх тайлбар бичжээ.

Эх сурвалж: Buzzfeed News