Ерөнхийлөгчийн мэтгэлцээний үеэр сонсож буй талын микрофоныг хаахаар болжээ
2020 оны АНУ-ын Ерөнхийлөгчийн сонгуульд нэр дэвшигчдийн сүүлийн мэтгэлцээн пүрэв гарагт болох гэж байна. Мэтгэлцээний комисс нэр дэвшигчдэд асуултдаа саадгүй хариулж, эсрэг талын нэр дэвшигчийн яриаг таслахаас сэргийлэхийн тулд сонсож буй талын микрофоныг автоматаар хаахаар болсноо мэдэгдлээ.
Бүгд Найрамдах намаас нэр дэвшигч, одоогийн Ерөнхийлөгч Доналд Трамп, Ардчилсан намаас нэр дэвшигч Дэд ерөнхийлөгч асан Жой Байден нар өнгөрсөн есдүгээр сарын 29-нд анхны халз мэтгэлцээнээ хийсэн билээ. Мэтгэлцэгчид өгөгдсөн асуултад тус бүр 2 минутын турш хариулах ёстой байтал Доналд Трамп өрсөлдөгчийнхөө яриаг удаа тасалж, хувийн чанартай дайралт хийснээр мэтгэлцээнийг эмх замбараагүй болгосон юм.
Олон нийтийн сүлжээнд үүнийг ерөнхийлөгчид нэр дэвшигчдийн халз мэтгэлцээн гэхээсээ цэцэрлэгийн хүүхдүүдийн маргаан шиг байлаа гэж шүүмжлэх хүн олон байв. Үүнтэй холбогдуулан Мэтгэлцээний комисс ийнхүү шинэ дүрэм мөрдөхөөр болсон бөгөөд талууд ч хүлээн зөвшөөрөөд байгаа аж. Энэ удаа нэр дэвшигчид зургаан багц сэдвийн хүрээнд мэтгэлцэх ба асуултад хариулах хугацаа урьдын адил тус бүр 2 минут байх гэнэ.
Дашрамд дурдахад, хоёр дахь халз мэтгэлцээн аравдугаар сарын 15-нд болох байсан ч Ерөнхийлөгч Доналд Трамп коронавирусийн халдвар авснаас үүдэн цуцлагдсан юм.
Эх сурвалж: Buzzfeed