Гадил идэж, H7N9 вирусийн халдвар туссан гэх ТАШАА мэдээлэлд битгий төөрөлдөөрэй
Хятад улсад гарсан ханиадны коронавирустэй холбоотойгоор "Энэ хугацаанд банана битгий идээрэй, ялангуяа NanHui 8424 сортын банана, NanHui-д одоогоор 13167 хүн халдвар авсан байна" гэсэн мэдээлэл цахим орчинд ихээр тархсан.
Уг мэдээллийг Factcheck.mn сайтын баг наягталж шалгахад уг вирус бананаар дамжсан гэх баримт хаана ч байхгүй байжээ. Хэдийгээр жимсээр халдварт өвчний вирус дамжих тохиолдол байдаг ч яг энэ төрлийн вирус бананаар дамжсан гэх мэдээлэл огт бүртгэгдээгүй байна. Түүнчлэн дээрх сэрэмжлүүлэг мэдээлэлд дурдсан "NanHui 8424" гэдэг нь банана бус тарвас аж. Мөн хятад хэл дээр уг мэдээллийг хуурамч болох тухай мэдээлж байгаа тул уг хуурамч мэдээлэл нь анх Хятад улсаас гарсан байх магадлалтай юм байна.
Түүнчлэн ЭМЯ-наас мэдээлснээр:
"НаньХуй 8424" сортын гадил жимсийг идсэний улмаас 23 хүн H7N9 вирусийн халдвараар өвчилж, "Шинхуа" эмнэлгийн Чунг Минг салбарт нас барлаа” гэсэн мэдээллийн мөрөөр холбогдох шалгалтыг хийж, үндэслэлгүй, ташаа мэдээлэл болохыг тогтоосон талаар Шинь Лианг Шанхай сайтад нийтэлжээ. Эх сурвалжийн мэдээлж буйгаар "Чунг Минг" эмнэлэгт ийм тохиолдол гараагүй бөгөөд Шанхайд “НаньХуй 8424” сортын гадил бус тарвас тариалдаг тухай дурдсан байна. H7N9 вирус нь шувууны тахал тул жимс жимсгэнээр халдварлах боломжгүйг мэдэгдлээ.
Иймд ямар нэгэн үндэслэлгүй, ташаа мэдээллийг олон нийтэд түгээж, иргэдийг төөрөгдүүлэхгүй байхыг анхааруулж байна.