Грэмми 2020: Билли Айлиш гол 4 шагналын эзэн болж, түүхэнд бичигдлээ
Анх 50 хүний өмнө гарч дуулж байсан жаахан охин хэдхэн жилийн дотор дэлхийн хамгийн алдартай уран бүтээлчдийн нэг болж чадлаа. 18 настай дуучин Билли Айлиш Грэммийн шагнал гардуулах ёслолын хамгийн том, гол 4 төрлийн шагналыг хүртэж, түүх бүтээлээ.
Шилдэг дуу, шилдэг дуу бичлэг, шилдэг цомог болон шинэ шилдэг залуу уран бүтээлч гэсэн хамгийн том шагналуудыг хүртсэн нь 1981 оноос хойших цор ганц, анхны тохиолдол болоод байна.
1981 онд Кристофер Кросс мөн яг энэ дөрвөн төрлийн эзэн болж байлаа.
Сонирхуулахад, Билли найман настайдаа Лос-Анжелес хотын хүүхдийн найрал дууны хамтлагт орсноор түүний хөгжмийн карьер эхэлсэн гэж хэлж болно. Харин 11 настайгаасаа эхлэн өөрөө дуунуудаа бичих болжээ. 14 настайдаа ахынхаа зохиосон "Ocean Eyes" нэртэй дууг "SoundCloud" дээр цацсанаар од болох гараа нь тавигджээ. 15 настайдаа "Don't Smile At Me" нэртэй мини цомог гаргаж, хөгжмийн ертөнцийн хамгийн том нөлөө бүхий дуу бичлэгийн компани болох "Interscope"-ийн гэрээг өөрийн болгож чадсан юм.