УИХ-ын сонгуулийн тойрог, мандатыг товлож буй талаар мэдвэл зохих 5-хан зүйл
Нийслэлээс УИХ-д сонгогдох мандатаас 4-ийг хөдөөд шилжүүлжээ
УИХ-ын сонгуулийн тухай хуулийн дагуу хоёрдугаар сарын 1-нээс өмнө УИХ-ын 2020 оны сонгуулийн санал хураах өдрийг товлох, тойрог болон нэр дэвшигчийн мандатын тоог тогтоож, УИХ-ын чуулганы нэгдсэн хуралдаанаар хэлэлцүүлэх ёстой. Эрх баригч МАН-ын Удирдах зөвлөл энэ асуудлаар хуралдахдаа улсын хэмжээнд 29 тойрог, 76 мандат байхаар шийдвэрлэснээс аймгуудад 20 тойрог, 52 мандат, нийслэлд 9 тойрог, 24 мандаттай байхаар шийдэх чиглэлийг УИХ дахь бүлэгтээ өгсөн байв. Нийслэлийн сонгогчид өмнө нь УИХ-д 28 гишүүн сонгож байснаас 4-ийг хөдөөд шилжүүлжээ гэсэн үг. Өнөөдөр МАН-ын бүлэг хуралдаж Удирдах зөвлөлөөс авсан чиглэлээ бататгасан шийдвэр гаргажээ. МАН сонгуулийн тойрог болон мандатыг хэрхэн хувааж буй үйл явцын талаар Таны мэдвэл зохих 5 зүйлийг жагсаая.
1.
УИХ-ын 2020 оны сонгуулийн санал хураах өдрийг зургадугаар сарын 24-нд товлож буй.
2.
Дундговь, Говь-Алтай, Булган, Сүхбаатар гэсэн дөрвөн аймгийн мандатын тоог нийслэлийн мандатаас шилжүүлэх замаар тус бүр нэгээр нэмэгдүүлж, хоёр мандаттай болгосон. Ингэхдээ Говьсүмбэр аймгийг Дундговь аймагтай нэгтгэн 2 мандаттай 1 тойрог болгож буй.
3.
Нийслэлийн 300 мянгаас дээш хүн амтай Баянзүрх болон Сонгинохайрхан гэсэн хоёр дүүрэгт тус бүр 5 мандат оноож байна. Ингэхдээ БЗД, СХД нь тус бүр 2-3 мандаттай 2 тойрогт хуваагдах нь.
4.
Баянгол, Чингэлтэй, Сүхбаатар, Хан-Уул дүүргүүд тус бүр 3 мандаттай 1 тойрогт, харин Налайх, Багануур, Багахангай дүүрэг тус бүр 2 мандаттай 1 тойрогт хуваагдаж байна.
5.
УИХ-ын Төрийн байгуулалтын байнгын хороо дээрх хуваарилалтыг хэлэлцээд УИХ-ын чуулганы нэгдсэн чуулганд батлуулахаар шилжүүлэх юм.