1 мин

Тусгай зөвшөөрлийг нь 3 сарын хугацаагаар түдгэлзүүллээ

Хэнтий, Дорнод, Сүхбаатарт шалгалт хийсэн байна.

Б.Энхцэцэг 2020.09.10

ХЗДХЯ-ны харьяа Оюуны өмчийн газраас холбогдох хууль тогтоомжийн дагуу энэ оны долдугаар сарын 19-26-нд Хэнтий, Дорнод, Сүхбаатар аймгуудад гүйцэтгэлийн шалгалтыг хийсэн байна.

Шалгалтаар Улсын байцаагчийн албан шаардлагын дагуу зохиогчийн эрхийн зөрчлөө арилгаж, өгөгдсөн хугацаатай үүрэг даалгавар биелүүлээгүй, эфирээр гарч байгаа гадаадын болон дотоодын кино, контент дуу хөгжим, бүжгийн бүтээлийн эрх эзэмшигчдээс зөвшөөрөл авч зохиогчийн эрхийн гэрээ байгуулаагүй, шалгалтанд хамрагдахаас зайлсхийх зэрэг зөрчлүүд илэрчээ.

Илэрсэн зөрчил, дутагдалтай холбогдуулан тус газраас Аж ахуйн үйл ажиллагааны тусгай зөвшөөрлийн тухай хуулийн 13 дугаар зүйл, Өргөн нэвтрүүлгийн тухай хуулийн 14 дүгээр зүйлийн 1 дэх хэсэг, мөн зүйлийн 1 дэх хэсгийн 3 дахь заалтыг үндэслэн нэр бүхий телевизүүдийн эфирийг хааж, Телевизийн үйлчилгээ эрхлэх тусгай зөвшөөрлийг энэ оны наймдугаар сарын 3-наас 90 хоногийн хугацаагаар түдгэлзүүлэх дүгнэлтийг Харилцаа холбооны зохицуулах хороонд хүргүүлсэн юм.

Монгол Улсын Харилцаа холбооны зохицуулах хорооноос дээрх хууль тогтоомж, дүгнэлтийг үндэслэн, хуулийн 9 этгээдийн “Телевизийн өргөн нэвтрүүлгийн үйлчилгээ эрхлэх” тусгай зөвшөөрөл, хуулийн 1 этгээдийн “Кабелийн сувгийн үйлчилгээ эрхлэх” тусгай зөвшөөрлийг 3 сарын хугацаатайгаар түдгэлзүүллээ.