2 мин

У.Хүрэлсүхийн мэдэгдлийн далд өгүүлбэрүүд

У.Хүрэлсүх ба Х.Баттулга

Б.Энхцэцэг 2021.01.21 6 5 3

16

Тэрбээр Ерөнхийлөгчийн сонгуульд өрсөлдөх тухайгаа ямар нэг үг хэлээгүй. Гэхдээ “Миний бие улс төрөөс явж байгаа юм биш” гэсэн нь хангалттай мэдээлэл юм. Ерөнхий сайдын албан тушаалаас огцорч байгаагаа олон нийтэд илэрхийлсэн мэдэгдлээс нь түүний дараагийн улс төрийн алхам илэрхий болж байна.  

Иргэдийн санаа бодлыг гуйвуулан улстөржүүлж, жагсаал цуглааныг үймээн самуун руу турхирч, цаашдаа ч улс орныг тогтворгүй, эмх замбараагүй байдал руу түлхэх гол дүрийг У.Хүрэлсүх өнөөдөр Ерөнхийлөгч Х.Баттулга хэмээн буруутгалаа. Ерөнхий сайд У.Хүрэлсүх гүйцэтгэх засаглалын тэргүүний үүргээ гүйцэтгэсээр Ерөнхийлөгчийн сонгуульд нэр дэвших бүрэн боломжтой байсан боловч залуусын жагсаал цуглаан түүнд хавьгүй эрт буух далим олголоо. 

Албаа өгч буй Ерөнхий сайд ба одоогийн Ерөнхийлөгчийн хоорондын гайхалтай дотно харилцаанд ийнхүү удахгүй болох Ерөнхийлөгчийн сонгуулийг чиглэн хагарсан ангал үүссэн нь ил болов. “Төрийн хоёр институц хооронд зүй бус харилцаа үүсэх, монгол хүний амь нас үрэгдэхээс болгоомжилж” У.Хүрэлсүх гүйцэтгэх засаглалын тэргүүнээс огцорч буйгаа илэрхийлсэн. Х.Баттулга дараагийн долдугаар сарын 1-ний буруутан болж мэдэхээс У.Хүрэлсүх урьдчилан сэргийлж буй нь улс төрд нөхөрлөж явсны “бэлэг” ч гэмээр.

Өөрийнх нь оронд шинэ Ерөнхий сайд томилогдсоноор ард түмний амгалан тайван, улс орны тогтвортой байдал хангагдана хэмээн тэрбээр үзэж байна. “Өөрийн сонгуулийн өрсөлдөгчөө улс төрийн замаар, улстөрчдийг айдсаар нь намнадаг” гэж У.Хүрэлсүх Ерөнхийлөгч Х.Баттулгыг шүүмжлээд, түүний энэ мэт гэм буруутай үйлдлүүдэд хариуцлага тооцно гэдэгт итгэлтэй байгаагаа хэлэв. Тэрбээр шударга Шүүх, Авлигатай тэмцэх газартай байхын төлөө зүтгэхээ мөн илэрхийлсэн. Эндээс харахад, У.Хүрэлсүх өөрийгөө Ерөнхийлөгч Х.Баттулгын гол өрсөлдөгч гэдгээ зарлаж, түүнээс Ерөнхийлөгчийн эрх мэдлийг авах тэмцлийг эхлүүлэв гэж ойлгож болохоор. Ерөнхийлөгч Х.Баттулга Ерөнхийлөгчийн дараагийн сонгуульд нэр дэвшигчээр тодорч чадахгүй байх магадлалыг ч У.Хүрэлсүхийн эл мэдэгдэл “далд” өгүүлж орхив.          

Ийнхүү У.Хүрэлсүх цар тахлын үеийн цаг наргүй, нэр хүндгүй албаасаа чөлөөлөгдөн Ерөнхийлөгчийн сонгуульд өрсөлдөх улс төрийн бэлтгэлдээ эргэлт буцалтгүй орлоо. Мөн түүний удирдаж буй МАН-ын 100 жилийн ой нэг сарын дараа тохиох тул энэ үйл явдлыг онцгой түүхтэй угтахыг ч үгүйсгэхгүй. 

Б.Энхцэцэг 2021.01.21

16