Инстаграмын алдарт "виртуал" од Микела Соуса
Lil Miquela нэрээр олонд танигдсан Микела Соуса нь 19 настай уран бүтээлч, модел, виртуал дүр юм. Микелагийн зохион бүтээгч нь робот техник, хиймэл оюун ухааны чиглэлээр мэргэшсэн "Brud" хэмээх баг билээ. Хамгийн анх 2016 оны дөрөвдүгээр сард түүний инстаграм хаягийг нээж байсан бөгөөд өдгөө түүний хаягийг дагагчид 1 сая хол давсан. Тэрбээр өөрийн инстаграмдаа өдөр тутмын хувцаслалт, хэв маягаа илэрхийлдэг байна.
Зураг | Тайлбар |
Зарим хүмүүс түүний дүрийг Их Британийн загвар өмсөгч Эмили Бадороос сэдэвлэн бүтээсэн гэж цуурдаг билээ. Тэдний нүүрний хэлбэр, богино чолк, нүүрэн дээрх сэвх мөн биеийн галбир зэрэг нь адилхан учир хүмүүсийг ингэж таамаглахад хүргэсэн биз.
Түүнчлэн Микела R&B, электро поп чиглэлээр нийт 5 сингл дуу гаргасан бөгөөд хамгийн анхны "Not Mine" дуугаа 2017 оны наймдугаар сард цацаж байжээ. Тухайн үед тус дуу нь Spotify аппликэйшны шилдэг дууны жагсаалтын 8-р байранд бичигдэж байжээ. Тэрбээр хамгийн сүүлд "Money", "Sleeping In" хэмээх хоёр уран бүтээлээ долдугаар сарын 31-нд цацсан юм.
Микела Prada, Chanel, Coach, Balenciage гэх мэт брендүүдийн моделиор ажилладагаас гадна, Highsnobiety, V magazine гэх мэт сэтгүүлүүдийн нүүрийг чимж байсан удаатай. Мөн тэрбээр "Time" сэтгүүлээс эрхлэн гаргадаг энэ оны "Интернэт дэх хамгийн нөлөө бүхий 25 хүн" жагсаалтад орсон юм. Сонирхуулахад түүний Белла Хадидтай хамтран тоглосон Келвин Клайн брэндийн сурталчилгаа нь багагүй шуугиан тариад амжсан билээ.
Бэлтгэсэн: С.Мөнхзул