Жүжигчин Лиам Нисон тулаант кинонд дахин хэзээ ч тоглохгүй гэв
Оскарын шагналд нэр дэвшиж, "Schindler's List", "Taken" болон өөр олон ч бүтээлээрээ бидний танил болсон алдарт жүжигчин Лиам Нисон дахин тулаант (Action) кинонд тоглохгүй гэдгээ мэдэгдлээ. Тэрээр 2021 оны хэдийд ч хамаагүй ийм төрлийн киноноос тэтгэвэртээ гарахаар төлөвлөж байгаа аж.
"Taken" 2008 онд гарахад хүмүүс түүний жүжиглэлт, чадвар, тулаант киног бодит мэт мэдрүүлэх чадварыг биширч, "Би чамайг олоод, үгүй хийх болно" гэдэг хэсгийг кино ертөнцийн алдартай сценүүдийн нэг гэж хүртэл тодорхойлсон.
Тэрээр тулаант киноноос зайгаа барих болсон шалтгаанаа өөрийн настай холбон тайлбарласан байна.
"Би одоо 68 нас хэдийнээ хол даваад явж байна. Удахгүй 69 хүрлээ. Хэрэв тахал гайгүй болбол энэ онд дахин хэд хэдэн кинонд тоглоод, түүний дараа би болихоор шийдсэн. Тэгээд л гүйцээ байх даа" хэмээн тэр "ET" сайтад өгсөн ярилцлагадаа дурджээ.
Түүний дүрээ мөнхөлсөн "Taken", "Unknown", "Non-Stop" зэрэг киног дахин үзэхэд таатай цаг үе тохиож байна.