1 мин

Какүрюү М.Ананд "Мичинокү" дэвжээнээс барилдана

Ж.Мөнхзул 2019.09.27

13

Японы Мэргэжлийн сүмо бөхийн их аварга Какүрюү М.Анандын багш "Изүцү" дэвжээний ояката, сэкивакэ асан Сакахоко таалал төгсөөд удаагүй байгаа билээ. Улмаар тус дэвжээ багшгүй болж, дэвжээнд харьяалагддаг бөхчүүдийг өөр дэвжээнд шилжүүлэх тухай яриа ойрын өдрүүдэд анхаарлын төвд байлаа.

 "Изүцү" дэвжээнд ёкозүна Какүрюүгээс гадна санданмэ, жонидан зиндааны хоёр бөх харьяалагдаж байжээ. Сүмо бөхийн холбооноос багшгүй болсон "Изүцү" дэвжээг хааж, бөхчүүдийг нь өөр дэвжээнд шилжүүлэх шийдвэр гаргасан бөгөөд дэвжээгээ хаалгахыг хүсээгүй Какүрюү М.Ананд бусад дэвжээний туслах ояката нараас дэвжээ удирдах хүн хайсан ч амжилт олоогүй юм. 

Энэ бүхний дараа Сүмогийн холбооноос тус дэвжээний бөхчүүдийг "Мичинокү" дэвжээнд шилжүүлэх шийдвэрийг гаргасан байна. "Мичинокү" дэвжээний ояката Киришима нь озэки цолтой барилддаг байжээ. М.Ананд тэргүүтэй бөхчүүдийг эгнээндээ нэгтгэснээр тус дэвжээнд 12 бөхтэй боллоо. Сонирхуулахад тус дэвжээнд Монголоос Кирибаяма Б.Лхагвасүрэн харьяалагддаг ажээ. 

Ж.Мөнхзул 2019.09.27

13