3 мин

Капитолын үймээнд оролцсон иргэд ажлаасаа халагдаж, зарим нь ял сонсож магадгүй байна

Б.Саруул 2021.01.08 1 1

14

Өнгөрсөн лхагва гарагт Ерөнхийлөгч Дональд Трампыг дэмжигчид АНУ-ын нийслэл Вашингтон хотод орших Капитолын ордон руу хүч түрэн орж, цагдаа, аюулгүй албаны ажилчидтай мөргөлдсөний улмаас дөрвөн хүн амиа алдаад байна. Ардчилсан засаглалтай АНУ-д ийм балмад, хэрцгий үйл явдал болсон нь дэлхий нийтийг цочроогоод байгаа юм. 

Нөхцөл байдал намжсаны дараа эмх замбараагүй байдал үүсгэсэн иргэдийг олж тогтоох, зохих хариуцлага хүлээлгэх ажил эхэлжээ. Гэрэл зураг болон дүрс бичлэгт царай нь гарсан зарим иргэд уг үйл явдалд оролцсоны улмаас ажлаасаа халагдаад байгаа гэнэ. Тухайлбал, маркетингийн чиглэлээр үйл ажиллагаа явуулдаг Navistar компани Капитолын үймээнд оролцсон ажилтнаа халж буйгаа мэдэгджээ. Гэрэл зураг нь сошиал медиад тарсан уг ажилтан Капитолын ордонд нэвтрэхдээ ажлынхаа үнэмлэхийг зүүсэн байжээ.

Ажлаасаа халагдсан Navistar компанийн ажилтан (хар өнгийн цамц, улаан малгайтай эрэгтэй)

"Бид ажилчдынхаа үг хэлэх, үзэл бодлоо илэрхийлэх эрх чөлөөгөө тайван замаар, хууль ёсны дагуу хэрэгжүүлэхийг дэмждэг боловч бусдын эрүүл мэнд, аюулгүй байдалд заналхийлсэн үйлдэл гаргасан хүнийг цаашид ажлын байраар хангах боломжгүй" гэж тус компани мэдэгдэлдээ дурджээ. 

Пол Дэвис

Эсэргүүцлийн үйл ажиллагаанд оролцож байгаагаа олон нийтийн сүлжээгээр зарласан Пол Дэвис гэх Техасын өмгөөлөгч мөн л ажлаасаа халагдсан байна. 

Paul Davis, Associate General Counsel, is no longer employed by Goosehead.

— Goosehead Insurance (@followgoosehead) January 7, 2021

Түүнчлэн өмнө нь Пенсильван мужийн төлөөлөгчөөр ажиллаж байсан Рик Сакконе Капитолын ордны гадаа байгаа зургаа фэйсбүүктээ оруулсан байжээ. Түүний одоо ажиллаж буй Сент-Винсент коллеж энэ явдлын дараа шалгалт явуулж, үр дүнд нь Сакконе ажлаасаа гарах өргөдлөө өгсөн болохыг коллежийн Маркетинг, олон нийттэй харилцах хэлтсийн ахлах захирал Майкл Хустава мэдэгджээ.

Энэ мэтчилэн ажил олгогчид эмх замбараагүй байдал үүсгэж, Капитолын ордонд нэвтэрсэн ажилтнаа халах, чөлөөлөх шийдвэрүүдийг гаргасаар байна. 

Үүнээс гадна цагдаагийн офицер руу халдсан, эд юмс хулгайлсан (засгийн газрын мэдлийн зөөврийн компьютер хүртэл багтжээ), эвдэлж сүйтгэсэн гэх үндэслэлээр 60 гаруй хүн баривчлагдаад байгаа аж. 

Дүүргийн өмгөөлөгч Майкл Шервин "Прокурорууд одоогоор 55 хэрэг үүсгэсэн бөгөөд үүний 15 нь үймээн самуун, бослого гаргахтай холбоотой холбооны гэмт хэрэг. Энэ тоо цаашид ч нэмэгдэнэ" гэж пүрэв гарагт сэтгүүлчдэд өгсөн мэдэгдэлдээ дурджээ. 

Бусдыг хуйвалдаан, үймээн самуунд уруу татсан, бослого гаргасан, Капитолын ордонд хүчээр нэвтэрсэн гэх мэт ноцтой гэмт хэрэгт холбогдсон иргэд буруутай нь тогтоогдвол 5 хүртэлх жилийн хорих ялаар шийтгүүлж магадгүй гэжээ. Үүгээр зогсохгүй холбооны засгийн газрын офицерийг зэвсгээр дайрч гэмтээвэл 20 жил хоригдох магадлалтай гэдгийг өмгөөлөгч Майкл Шервин цохон тэмдэглэсэн байна. 

Капитолын үймээний үеэр цагдаагийн албан хаагч амиа алдсантай холбоотойгоор Хууль зүйн яам хавтаст хэрэг нээсэн тухай NPR буюу Америкийн Үндэсний Олон Нийтийн Радио пүрэв гарагт мэдээлжээ.

Эх сурвалж: CNN, Fortune

Б.Саруул 2021.01.08

14