Кенийн парламент гишүүн онгоцонд унгахыг хязгаарласан хууль санаачилахыг шаарджээ
Өнгөрсөн сард Кенийн парламентийн гишүүд агаарын тээврээр зорчих үед үйлдэгдсэн гэмт хэргийг зохицуулах хуулинд нэмэлт, өөрчлөлт оруулах хэлэлцүүлгийг хийжээ.
Энэ үеэр парламентийн гишүүн Лилиан Ачиенг Гого онгоцонд унгах тухай асуудлыг зохицуулсан хууль санаачлахыг шаардсан гэнэ. Тэрбээр "Онгоцонд хийгээ гаргах тухай асуудлыг хүмүүс ихэвчлэн үл тоомсорлодог. Гэхдээ үүнийг зохицуулахгүй бол бусад хүмүүсийн тав тухыг алдагдуулаад зогсохгүй хөлөгт аюултай байдал үүсгэж болзошгүй" хэмээгээд үүнийг шийдвэрлэхийн тулд хөлгийн гишүүд гэдэсний хий дарах үйлчилгээтэй эм, бэлдмэлийг тогтмол авч явж, шаардлагатай үед зорчигдыг хангадаг байх хэрэгтэй гэжээ.
Түүнчлэн Ачиенг Гого зарим зорчигчид нислэгийн үеэр согтууруулах ундаа хэтрүүлэн хэрэглэдэг тухай дурдаад эрүүл мэндийн бичиг үзүүлсний дараа согтууруулах ундаа авдаг болох санаачилгыг дэвшүүлсэн байна.
Үүний өмнөхөн парламентийн нэгэн гишүүн хэлэлцүүлгийн танхимд унгаснаас болж "агаар бохирдуулсан" хэмээн буруутгагдаж, улмаар гишүүдийн хооронд маргаан үүссэн аж. Харин хурал даргалагч Эдвин Какач нэн даруй агаар цэвэршүүлэгч авчрахыг үүрэгдээд, хурлыг түр завсарлуулжээ.
Хэдийгээр парламентийн танхим дахь эвгүй үнэр арилсан ч Лилиан Ачиенг Гого тэргүүтэй гишүүд онгоцонд унгахыг хязгаарлах тухай санаачилгын талаар ярилцаж, ширүүн хэлэлцүүлэг өрнүүлжээ.
Эх сурвалж: BBC, Daily Mail