2 мин

Хайр дурлалын тухайд ганц бие хүмүүсээс суралцаж болох 5 зүйл

О.Анхзаяа 2019.11.11 14 2 2

188

Өнөөдөр дэлхийн ганц бие хүмүүсийн өдөр гэнэ. Тиймээс өнөөдөр ганц бие хүмүүсийн тухай нийтлэлүүдийг та бүхэндээ түлхүү хүргэхээр шийдлээ. 

Ганц бие хүмүүсээс суралцаж болох 5 зүйл

1. Өөрөө өөртөө цаг гаргах нь чухал

Хайртай хүнээ олж, ганц бие байхаа больсон цагаас эхлээд л бид бүх цаг зав, сэтгэлээ өөртөө хадгалах биш харин нөгөө хүндээ цацаж эхэлдэг. Заримдаа хайр сэтгэл биднийг өөрийгөө мартахад хүргэдэг шүү дээ. Харин ганц бие танилууд, найз нөхдөө харахад тэд өөрсдөдөө цаг гаргаж, өөрсдийгөө хайрлах тал дээр ихээхэн анхаарал тавьдаг. Тиймээс хэн нэгнийг хайрлалаа гээд өөрийгөө мартаж болохгүй.

2. Найз нөхөд, гэр бүлээсээ холдохгүй байх 

Бид заримдаа эхнэр, нөхөр, үерхдэг охин, залуутайгаа хэтэрхий их цагийг өнгөрүүлэх болсноос болоод найз нөхдөөсөө холдож, гэр бүлдээ цаг гаргах нь багасдаг. Гэхдээ бусад дотнын хүмүүсээ ч бас мартахгүй халамжилж, цагийг хамт өнгөрүүлж байх ёстойгоо мартаж болохгүй.

3. Юунд ч яарах хэрэггүй 

"Энэ л миний хайр" гэж бодсон цагт бид заримдаа яарсан алхам хийх гээд байдаг. Бушуухан тэр хүнтэй нэг гэрт ормоор ч юм шиг, бүр үр хүүхэдтэй болмоор, сургууль ажлаа орхичихмоор ч юм шиг, юм болгонд нэг л яарсан, давшилсан шийдвэр гаргах гээд байдаг. Гэхдээ юунд ч яарах хэрэггүй, байгаа цаг үеэ мэдэрч, алхам алхмаар ойртох ёстой гэдгийг та анхаарах ёстой. Ганц бие хүмүүсийн нэг сайн тал нь тэд аливаад хүлээцтэй бөгөөд яарсан шийдвэр гаргадаггүй билээ. 

4. Ямар ч хэцүү асуудал үүрд үргэлжлэхгүй

Заримдаа жаахан маргаан эсвэл үл ойлголцол биднийг тэслэх шахам уурлуулж бас айлгаж, сэтгэл хөдлөлийн асар хүнд, ярвигтай мэдрэмжид оруулдаг. Үүнээс болоод хосын харилцаанд байдаг ихэнх залуус түргэдсэн шийдвэр гаргах, болох болохгүй үг хэлэх алдаанууд гаргадаг. Харин та ганц бие хүмүүсээс нэгэн үнэтэй хичээлийг сурч мэдэж болох бөгөөд тэр нь ямар ч зүйл үүрд үргэлжлэхгүй бөгөөд бүх зүйл сайхан болно гэсэн итгэл, өөрийгөө тайван байлгаж аргадах арга юм.

5. Хөгжилд, зугаац, хүссэнээрээ бай!

Ямар ч насны хүн байлаа гэсэн, ямар нэгэн харилцаанд хэр удаан байснаасаа үл шалтгаалан үргэлж залуугаараа байх хэрэгтэй. Та нэгэн хэвийн, баригдмал байдлаас зайлсхийж, аливаа зүйлийг хийхдээ өөрийгөө барьж хорих хэрэггүй. Харин ч чөлөөтэй, эрх дураараа, яг л анх ямар байсан тийм жаргалтай, цоглог хэвээрээ байх хэрэгтэй. Бид үүрэг хариуцлага нэмэгдэхийн хэрээр өөрсдийгөө улам их стрессээр дардаг. Гэхдээ аливаа жижигхэн зүйлээс хөгжилдөж, сэтгэлээ сэргээх арга олж байгаарай. "Би үүнд хэтэрхий оройтсон" гэх бодлыг хэзээ ч бүү хүлээн зөвшөөр!

Зургууд: Pinterest

О.Анхзаяа 2019.11.11

188