Хөл хорионд орох захирамжийг эсэргүүцэж үдэшлэг зохион байгуулсан залуусын нэг нь халдвар авчээ
АНУ-д коронавирусийн халдвар эрчимтэй нэмэгдэж байгаагийн улмаас мужууд хөл хорио тогтоох, иргэдийг гэрээсээ гарахгүй байх, өөрийгөө тусгаарламжийг захирамжийг гаргаж байна. Харин Кентакки мужид хэсэг залуус эл захирамжийг эсэргүүцэн "Коронавирусийн үдэшлэг" зохион байгуулсны улмаас халдвар авсан тохиолдол гарчээ. Мужийн захирагч Энди Бэшарын мэдэгдсэнээр, үдэшлэгт явсан залуучуудаас одоогийн байдлаар нэг нь коронавирусийн халдвар авсан нь батлагдаад байна гэжээ.
ДЭМБ 60-аас дээш насныхныг эрсдэлт бүлэгт хамруулсан ч энэ нь хүүхэд, залуус коронавирусийн халдвар авахгүй гэсэн үг биш болохыг анхааруулж байна. Түүнчлэн халдвар авсан залуучуудад ноцтой шинж тэмдэг илрэхгүй байж болох тул вирусийн халдварыг бусдад түгээх аюултай гэжээ. Иймд залуучуудыг ч мөн адил гэртээ байж, олон хүнтэй газраар явахгүй байхыг сануулж байгаа юм.
Вирусийн халдвар богино хугацаанд эрчимтэй нэмэгдсэн нь шинж тэмдэг илэрдэггүй халдвар тээгчдээс улбаатай болохыг БНХАУ-д бүртгэгдсэн халдварын тохиолдлуудад үндэслэн гаргасан судалгааны үр дүнгээс харж болно. Түүнчлэн БНХАУ-тай харьцуулахад АНУ-д залуучууд коронавирусийн халдвар авах нь илүү өндөр байгааг өнгөрсөн долоо хоногт Өвчнийг хянах, урьдчилан сэргийлэх төвөөс гаргасан тайланд дурджээ. Тодруулбал, АНУ-д коронавирусийн халдвар авч, тусгаарлагдсан иргэдийн 20 орчим хувийг 20-44 насныхан бүрдүүлж байна.
Мөн БНХАУ-д хийгдсэн судалгаагаар, 2000 гаруй хүүхэд Covid-19 өвчнөөр өвчилжээ. Хэдийгээр халдвар авсан хүүхдүүд насанд хүрэгчидтэй харьцуулахад хөнгөн хэлбэрээр өвчилж байсан ч хүүхэд тэр дундаа, нярай хүүхэд вирусийн халдварт өртөмтгий байгааг судлаачид онцолжээ.
Эх сурвалж: CNN, BBC
Зочин 2020.03.27 162.158.118.39
Хохинэээээээээ
0 0 Хариулах