1 мин
Хөл хорионы үеэр эхнэртэйгээ муудалцсан эр гэрээсээ гарч яваад 450 км алхсан байжээ
Б.Саруул
10 
4 
3 
Италийн Комо хотод амьдардаг 48 настай эрэгтэй эхнэртэйгээ муудалдаж, улмаар гэрээсээ гарч алхсаар 450 км замыг туулсан тухай Ил Ресто дел Карлино сонин мэдээлжээ. Түүнийг гэрээсээ гарч явснаас хойш долоо хоногийн дараа Адриатын эрэг орчмын Фано хотод явж байхад нь олсон байна.
Цагдаа нар түүнийг шөнийн 2 цагт гадаа явж байхад нь зогсоож, хөл хорионы дэглэм зөрчсөн гэх үндэслэлээр 400 евро (485 доллар)-гоор торгожээ. Сонинд гарсан мэдээ тун удалгүй сошиал медиад тархаж, италичууд түүнд "Форрест Гамп" хэмээх хоч өгөөд байгаа аж.
Түүнчлэн цахим орчинд хүмүүс маргаан өрнүүлж, түүнийг торгохын оронд шагнах хэрэгтэй, шинэ гутал авч өгсөн нь дээр, хүч хэрэглэхийн оронд уураа гаргах гэж алхсан нь сайн хэрэг гэх мэтчилэн үзэл бодлоо илэрхийлжээ.
Тэрбээр цагдаад мэдүүлэхдээ "Би энэ хүртэл алхаж ирсэн. Ямар нэгэн тээврийн хэрэгсэлд суугаагүй ээ. Замд явж байхад хүмүүс хоол, уух зүйлээр намайг дайлсан. Би бага зэрэг ядарсныг эс тооцвол зүв зүгээр" гэж ярьсан байна.
Цагдаа нар түүний биеийн байцаалтыг шалгаж хэн болохыг нь тогтоосон байна. Мөн энэ хугацаанд эхнэр нь түүнийг сураггүй болсон хэмээн цагдаад мэдүүлсэн байжээ. Цагдаагийн газраас түүний эхнэрт мэдээлэл хүргэж улмаар тэрбээр нөхрөө авахаар Фано хотод ирсэн гэнэ.
Эх сурвалж: BBC
Хамгийн их уншилттай 
холбоотой мэдээ 
санал болгох 
Сэтгэгдэл бичих (0)
О.Анхзаяа