1 мин

Хүн аалзны багтай эр Индонезийн үндэсний баатар болж байна

Б.Саруул 2020.02.20 2 1

25

Индонез улс жилд 3.2 сая тонн хог хаягдал ялгаруулдаг бөгөөд тэдгээрийн тэн хагас нь далайд хаягдаж байна. Тэгвэл Руди Хартоно гэх эр хүрээлэн буй орчны бохирдолд олон нийтийн анхаарлыг хандуулахын тулд нэгэн сонирхолтой арга бодож олжээ. 

Тэрбээр өмнө нь Парепаре хотын эрэг дагуу оршин суудаг иргэдийг гудамж талбай болон далайн эргийн дагуух хог хаягдлыг цэвэрлэхийг уриалдаг байсан ч төдийлөн амжилтад хүрээгүй гэнэ. Харин хүн аалзны баг өмсөн хог хаягдал цэвэрлэж эхэлснээс хойш олон нийтийн анхаарлыг татах болжээ. Индонезийн хэд хэдэн телевиз, сонин түүнээс ярилцлага авч, Хартоно иргэдийн талархал, дэмжлэгийг хүлээж байна. 

Анх тэр зээ дүүгээ зугаацуулахын тулд хүн аалзны өмсгөл худалдаж авсан ч дараа нь ийнхүү байгаль орчны төлөөх санаачилгадаа ашиглаж эхэлжээ. Хартоногийн ажил орой 19 цагт эхэлдэг бөгөөд тэрнээс өмнө хүн аалзны хувцсаа өмсөн, хог хаягдал цэвэрлэх ажлаа амжуулдаг аж. Тэрбээр Индонезийн засгийн газар хог хаягдлын менежментээ сайжруулж, нэг удаагийн хуванцар сав, баглаа боодлын хэрэглээг бууруулна гэдэгт найдаж байгаагаа илэрхийлжээ. 

Дашрамд, 2018 онд Индонезийн Байгаль орчин, ойн аж ахуй яамнаас гаргасан мэдээллээр, 142 мянган оршин суугчтай Парепаре хот өдөртөө 2.7 тонн хог гаргадаг гэжээ. 

Индонез улс 17 мянган жижиг арлаас бүрддэг бөгөөд хуванцар хог хаягдлын хэмжээгээрээ дэлхийд БНХАУ-ийн дараа бичигдэж байгаа юм. 

Эх сурвалж: We Forum

Б.Саруул 2020.02.20

25